വെടിച്ചില്ല് ഗോളുമായി പരേഡസ്,അർജന്റീനക്ക് ജയം.

ഒരല്പം മുമ്പ് നടന്ന അന്താരാഷ്ട്ര സൗഹൃദ മത്സരത്തിൽ ലോകചാമ്പ്യൻമാരായ അർജന്റീനക്ക് വിജയം.എതിരില്ലാത്ത രണ്ട് ഗോളുകൾക്കാണ് അർജന്റീന ഇൻഡോനേഷ്യയെ പരാജയപ്പെടുത്തിയത്.ലിയാൻഡ്രോ പരേഡസ്,ക്രിസ്റ്റ്യൻ റൊമേറോ എന്നിവരാണ് അർജന്റീനയുടെ ഗോളുകൾ നേടിയത്.

നിക്കോ ഗോൺസാലസ്,ഹൂലിയൻ ആൽവരസ്,ബുവോനനോറ്റെ എന്നിവരായിരുന്നു അർജന്റീനയുടെ മുന്നേറ്റത്തിൽ ഉണ്ടായിരുന്നത്.38ആം മിനുട്ടിലാണ് പരേഡസിന്റെ ഗോൾ പിറന്നത്.പലാസിയോസിന്റെ പാസ് സ്വീകരിച്ച താരം ബോക്സിന് വെളിയിൽ നിന്നും ഒരു ഉജ്ജ്വല ഷോട്ടിലൂടെ പന്ത് വലയിൽ എത്തിക്കുകയായിരുന്നു.

പിന്നീട് 55ആം മിനുട്ടിൽ ലോ സെൽസോയുടെ കോർണർ കിക്കിൽ നിന്നും റൊമേറോ ഹെഡറിലൂടെ ഗോൾ നേടുകയായിരുന്നു.ഈ രണ്ട് ഗോളുകളാണ് അർജന്റീനക്ക് ജയം നൽകിയത്.സൂപ്പർ താരം മെസ്സിയുടെ അഭാവത്തിലാണ് അർജന്റീന ഇന്നിറങ്ങിയത്.