മെസ്സി മാപ്പ് പറഞ്ഞു :ലാഹോസ്

കഴിഞ്ഞ ഖത്തർ വേൾഡ് കപ്പിന്റെ ക്വാർട്ടർ ഫൈനൽ പോരാട്ടത്തിൽ നെതർലാന്റ്സിനെ പരാജയപ്പെടുത്തി കൊണ്ടായിരുന്നു അർജന്റീന മുന്നേറിയിരുന്നത്. ആ മത്സരം വളരെയധികം സംഭവബഹുലമായിരുന്നു. 17 യെല്ലോ കാർഡുകളായിരുന്നു ആ മത്സരത്തിൽ മാറ്റിയോ ലാഹോസ്‌ പുറത്തെടുത്തിരുന്നത്. ഒരു റെഡ് കാർഡും പിറന്നിരുന്നു. ഏറെ സംഭവ വികാസങ്ങൾക്കൊടുവിൽ പെനാൽറ്റി ഷൂട്ടൗട്ടിലാണ് അർജന്റീന വിജയം നേടിയത്.

ലയണൽ മെസ്സി ആ മത്സരത്തിൽ വളരെയധികം അഗ്രസീവായിരുന്നു.ഡച്ച് താരങ്ങളോടും പരിശീലകനോടും മെസ്സി ദേഷ്യപ്പെട്ടിരുന്നു. മാത്രമല്ല റഫറിയായ ലാഹോസിനോടും മെസ്സി മോശമായ രൂപത്തിലായിരുന്നു പെരുമാറിയിരുന്നത്.ഇക്കാര്യം ലാഹോസ് തന്നെ തുറന്നു പറഞ്ഞിട്ടുണ്ട്. മാത്രമല്ല അന്നത്തെ മോശം പെരുമാറ്റത്തിൽ മെസ്സി തന്നോട് മാപ്പ് പറഞ്ഞുവെന്നും ലാഹോസ് കൂട്ടിച്ചേർത്തു.അദ്ദേഹത്തിന്റെ വാക്കുകൾ ഇങ്ങനെയാണ്.

“നെതർലാന്റ്സിനെതിരെയുള്ള മത്സരത്തിനുശേഷം ലയണൽ മെസ്സി എന്നെ വിളിച്ചിരുന്നു. മത്സരത്തിനിടയിൽ എന്നോട് മെസ്സി വളരെ മോശമായി കൊണ്ടായിരുന്നു പെരുമാറിയിരുന്നത്. അതിന് അദ്ദേഹം മാപ്പ് പറഞ്ഞു. ആ മത്സരത്തിൽ വ്യത്യസ്തനായ ഒരു മെസ്സിയെയാണ് നമ്മൾ കണ്ടത്. വേൾഡ് കപ്പിൽ വളരെ മോശം പെരുമാറ്റമായിരുന്നു മെസ്സിയിൽ നിന്നും ഉണ്ടായത്.അത് തീർത്തും നാണക്കേടാണ്.ഞങ്ങൾ ഒരുമിച്ച് 50 ഓളം മത്സരങ്ങളിൽ പ്രവർത്തിച്ചിട്ടുണ്ട്. മെസ്സി ഡച്ച് പരിശീലകനെതിരെ നടത്തിയ ആ സെലിബ്രേഷൻ കാര്യങ്ങളെ കൂടുതൽ വഷളാക്കി. അത് അവരെ പ്രകോപിപ്പിക്കുകയായിരുന്നു ” ഇതാണ് ലാഹോസ്‌ പറഞ്ഞത്

ഏതായാലും വേൾഡ് കപ്പിൽ തികച്ചും അഗ്രസീവ് ആയ ഒരു മെസ്സിയെയായിരുന്നു നമുക്ക് കാണാൻ സാധിച്ചിരുന്നത്. അതോടൊപ്പം തന്നെ മികച്ച പ്രകടനമായിരുന്നു അദ്ദേഹം നടത്തിയിരുന്നത്. വേൾഡ് കപ്പിലെ ഏറ്റവും മികച്ച താരത്തിനുള്ള പുരസ്കാരം മെസ്സിയായിരുന്നു സ്വന്തമാക്കിയിരുന്നത്.