മെസ്സി ഞങ്ങൾക്കൊപ്പം തുടരുക തന്നെ വേണം :ഹൂലിയൻ ആൽവരസ്

സൂപ്പർ താരം ലയണൽ മെസ്സി തന്റെ കരിയറിന്റെ അവസാന സമയത്തിലൂടെയാണ് കടന്നുപോയിക്കൊണ്ടിരിക്കുന്നത്. ഇനി ഒരുപാട് വർഷം ഒന്നും മെസ്സി കളിക്കളത്തിൽ ഉണ്ടാവില്ല എന്നത് വ്യക്തമാണ്. വരുന്ന കോപ്പ അമേരിക്കയിൽ അർജന്റീനയെ മെസ്സി തന്നെയായിരിക്കും നയിക്കുക. പക്ഷേ വരുന്ന വേൾഡ് കപ്പിൽ മെസ്സി ഉണ്ടാകുമോ എന്ന കാര്യത്തിൽ സംശയങ്ങൾ നിലനിൽക്കുന്നുണ്ട്. അക്കാര്യത്തിൽ മെസ്സി തീരുമാനങ്ങൾ ഒന്നും എടുത്തിട്ടില്ല.

തന്റെ വിരമിക്കൽ അധികം ദൂരത്ത് അല്ല എന്നത് ലയണൽ മെസ്സി തന്നെ ഈയിടെ തുറന്നു പറഞ്ഞിരുന്നു. പക്ഷേ അർജന്റീനയിലെ എല്ലാവരും ലയണൽ മെസ്സി ഇനിയും സാധ്യമാകുന്ന കാലം കളിക്കാനാണ് ആഗ്രഹിക്കുന്നത്. അക്കാര്യം അർജന്റൈൻ സൂപ്പർ താരമായ ഹൂലിയൻ ആൽവരസും തുറന്ന് പറഞ്ഞിട്ടുണ്ട്. മെസ്സി അർജന്റീനക്കൊപ്പം തുടരണമെന്ന് തന്നെയാണ് ആൽവരസ് ആവശ്യപ്പെട്ടിട്ടുള്ളത്.ഗോളിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.ആൽവരസിന്റെ വാക്കുകൾ ഇങ്ങനെയാണ്.

“ലയണൽ മെസ്സി എന്റെ ഐഡോളാണ്. ഞാൻ അർജന്റീന സീനിയർ ടീമിന്റെ ട്രെയിനിങ് സെഷനിൽ എത്തിയ ആദ്യദിവസം തന്നെ മെസ്സിയോടൊപ്പം ഒരു ഫോട്ടോ ആവശ്യപ്പെടുകയായിരുന്നു. ഇന്ന് മെസ്സിക്കൊപ്പം കളിക്കുന്ന ഓരോ നിമിഷങ്ങളും ഞാൻ ആസ്വദിക്കുകയാണ്.ഞങ്ങൾ നേടിയ നേട്ടങ്ങളിൽ എല്ലാം തന്നെ ഞാൻ വളരെയധികം അഭിമാനം കൊള്ളുന്നു.മെസ്സി എത്രകാലം അർജന്റീനയിൽ തുടരും എന്നത് അദ്ദേഹത്തെ ആശ്രയിച്ചാണ് നിലകൊള്ളുന്നത്.പക്ഷേ സാധ്യമാകുന്ന അത്രയും കാലം അദ്ദേഹം ഞങ്ങളോടൊപ്പം തുടരണം. അതാണ് അർജന്റീനയിലെ എല്ലാ താരങ്ങളും ആഗ്രഹിക്കുന്നത് “ഇതാണ് ആൽവരസ് പറഞ്ഞിട്ടുള്ളത്.

24 വയസ്സിനുള്ളിൽ തന്നെ ഫുട്ബോൾ ലോകത്തെ എല്ലാ പ്രധാനപ്പെട്ട കിരീടങ്ങളും നേടിയിട്ടുള്ള താരമാണ് ഹൂലിയൻ ആൽവരസ്. മാഞ്ചസ്റ്റർ സിറ്റിക്കൊപ്പവും അർജന്റീനക്കൊപ്പവും സുവർണ്ണ ഘട്ടത്തിലൂടെയാണ് അദ്ദേഹം കടന്നു പോയിക്കൊണ്ടിരിക്കുന്നത്. മാത്രമല്ല നിലവിൽ മികച്ച പ്രകടനം അദ്ദേഹം നടത്തുന്നുണ്ട്. അവസാനമായി കളിച്ച ഏഴ് മത്സരങ്ങളിൽ നിന്ന് ഏഴു ഗോളുകളും രണ്ട് അസിസ്റ്റുകളും അദ്ദേഹം സ്വന്തമാക്കിയിരുന്നു.