മെസ്സി എന്ത് എപ്പോൾ ചെയ്യുമെന്ന് പറയാനാവില്ല : ലൗറ്ററോ മാർട്ടിനസ്

സൂപ്പർ താരം ലയണൽ മെസ്സിക്കൊപ്പം അർജന്റീനയുടെ ദേശീയ ടീമിന്റെ മുന്നേറ്റ നിരയിൽ കളിക്കുന്ന താരമാണ് ലൗറ്ററോ മാർട്ടിനസ്. ലയണൽ സ്‌കലോണിക്ക് കീഴിൽ അർജന്റീനക്ക് വേണ്ടി ഏറ്റവും കൂടുതൽ ഗോളുകൾ നേടിയ താരങ്ങളിൽ ഒരാളാണ് ലൗറ്ററോ. അർജന്റീനയുടെ മുന്നേറ്റത്തിൽ മെസ്സിയുടെയും ലൗറ്ററോയുടെയും അണ്ടർസ്റ്റാൻഡിങ് വളരെ പ്രധാനപ്പെട്ട കാര്യമാണ്.

ലയണൽ മെസ്സിക്കൊപ്പം കളിക്കുന്നതിനെക്കുറിച്ചുള്ള അനുഭവങ്ങൾ ഇപ്പോൾ ലൗറ്ററോ പങ്കുവെച്ചിട്ടുണ്ട്. അതായത് ലയണൽ മെസ്സി എന്ത് എപ്പോൾ ചെയ്യുമെന്ന് പറയാനാവില്ലന്നും അതുകൊണ്ടുതന്നെ എപ്പോഴും നാം തയ്യാറായിരിക്കണം എന്നുമാണ് ലൗറ്ററോ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

” നമ്മൾ എപ്പോഴും തയ്യാറായിരിക്കണം.കാരണം മെസ്സി എന്ത് എപ്പോൾ പ്രവർത്തിക്കുമെന്ന് നമുക്ക് പറയാൻ ആവില്ല. പരിശീലനങ്ങളിലും മത്സരങ്ങളിലും ഞങ്ങൾക്ക് പരസ്പരം മനസ്സിലാക്കാൻ സാധിക്കാറുണ്ട്.ഞങ്ങൾ വളരെ കുറച്ചു മത്സരങ്ങൾ മാത്രമാണ് ഒരുമിച്ച് കളിച്ചിട്ടുള്ളത്.അദ്ദേഹത്തിന്റെ ഓരോ ചലനങ്ങളും ശ്രദ്ധയോടെ ഞങ്ങൾ വീക്ഷിക്കാറുണ്ട്.അദ്ദേഹത്തെ സഹായിക്കാൻ ശ്രമിക്കും.അദ്ദേഹമാവട്ടെ ഞങ്ങൾക്ക് ഗോളവസരങ്ങൾ ഒരുക്കി തരുകയും ചെയ്യും ” ലൗറ്ററോ പറഞ്ഞു.

ഈ കഴിഞ്ഞ ഇന്റർനാഷണൽ ബ്രേക്കിൽ അർജന്റീനക്ക് വേണ്ടി വളരെ മികച്ച പ്രകടനം നടത്താൻ മെസ്സിക്കും ലൗറ്ററോക്കും സാധിച്ചിരുന്നു.ആകെ നാല് ഗോളുകൾ ആയിരുന്നു മെസ്സി നേടിയിരുന്നത്. അതേസമയം ഗോൾ നേടാൻ ലൗറ്ററോക്കും സാധിച്ചിരുന്നു.