മെസ്സിയേക്കാൾ കൂടുതൽ എന്നെ ബുദ്ധിമുട്ടിച്ചത് എംബപ്പേയാണ് : പോളിഷ് താരം പറയുന്നു

കഴിഞ്ഞ ഖത്തർ വേൾഡ് കപ്പിൽ അർജന്റീനക്കെതിരെയും ഫ്രാൻസിനെതിരെയും കളിക്കേണ്ടി വന്നിട്ടുള്ള ടീമാണ് പോളണ്ട്. ഗ്രൂപ്പ് ഘട്ടത്തിലായിരുന്നു പോളണ്ടും അർജന്റീനയും തമ്മിൽ ഏറ്റുമുട്ടിയത്. ആ മത്സരത്തിൽ എതിരില്ലാത്ത രണ്ട് ഗോളുകൾക്ക് പോളണ്ട് പരാജയപ്പെട്ടു. പിന്നീട് പ്രീ ക്വാർട്ടറിൽ പോളണ്ടും ഫ്രാൻസും തമ്മിൽ ഏറ്റുമുട്ടി. ഒന്നിനെതിരെ മൂന്നു ഗോളുകൾക്കായിരുന്നു ആ മത്സരത്തിൽ പോളണ്ട് പരാജയപ്പെട്ടത്.കിലിയൻ എംബപ്പേ രണ്ട് ഗോളുകൾ ആ മത്സരത്തിൽ നേടിയിരുന്നു.

ഈ രണ്ട് മത്സരങ്ങളും കളിച്ചിട്ടുള്ള താരമാണ് പോളണ്ടിന്റെ ഫുൾ ബാക്ക് ആയ മാറ്റി ക്യാഷ്. ഇപ്പോൾ മെസ്സി,എംബപ്പേ എന്നിവരെ നേരിട്ടതിനെക്കുറിച്ച് ചില കാര്യങ്ങൾ ഇദ്ദേഹം പറഞ്ഞിട്ടുണ്ട്.അതായത് ലയണൽ മെസ്സിയെക്കാൾ തന്നെ ഏറെ ബുദ്ധിമുട്ടിച്ചത് കിലിയൻ എംബപ്പേയായിരുന്നു എന്നാണ് ഇദ്ദേഹം പറഞ്ഞിട്ടുള്ളത്. ഇതിനുള്ള വിശദീകരണവും ക്യാഷ് നൽകുന്നുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്തിരിക്കുന്നത് ഇങ്ങനെയാണ്.

” ഫ്രാൻസിനെതിരെയുള്ള മത്സരത്തിനു മുന്നേ ഞാൻ കിലിയൻ എംബപ്പേയുടെ വീഡിയോകൾ ശ്രദ്ധാപൂർവ്വം കണ്ടിരുന്നു. എങ്ങനെയാണ് ഞാൻ അദ്ദേഹത്തെ തടയുക എന്ന് ചിന്തിച്ചു കൊണ്ടേയിരുന്നു.കളിക്കളത്തിൽ ഞങ്ങൾ തമ്മിൽ നല്ലൊരു പോരാട്ടമാണ് ഉണ്ടായത്.ചില സമയങ്ങളിൽ അദ്ദേഹം എന്നെ മറികടന്നു, ചില സമയങ്ങളിൽ ഞാൻ അദ്ദേഹത്തിൽ നിന്നും പങ്കെടുക്കുന്നതിൽ വിജയിച്ചു. മെസ്സി കളിക്കളത്തിന്റെ മറുഭാഗത്തായിരുന്നു ഉണ്ടായിരുന്നത്.അതുകൊണ്ടുതന്നെ മെസ്സിയെക്കാൾ കൂടുതൽ എന്നെ ബുദ്ധിമുട്ടിച്ചത് എംബപ്പേയാണ്. മെസ്സിയുടെ ക്വാളിറ്റി എന്താണ് എന്നുള്ളത് നമുക്കെല്ലാവർക്കും അറിയാം. പക്ഷേ എന്നെ സംബന്ധിച്ചിടത്തോളം എംബപ്പേയായിരുന്നു ഏറ്റവും വലിയ പരീക്ഷണം”മാറ്റി ക്യാഷ് പറഞ്ഞു.

ഫൈനലിൽ അർജന്റീനയും ഫ്രാൻസും തമ്മിലായിരുന്നു ഏറ്റുമുട്ടിയിരുന്നത്. മത്സരത്തിൽ മികച്ച പ്രകടനം പുറത്തെടുക്കാൻ എംബപ്പേക്കും മെസ്സിക്കും സാധിച്ചിരുന്നു.എംബപ്പേ 3 ഗോളുകൾ നേടിയപ്പോൾ മെസ്സി രണ്ടു ഗോളുകളാണ് നേടിയിരുന്നത്.