മെസ്സിയെ ഇന്ത്യയിലേക്ക് കൊണ്ടുവരണം :എമി മാർട്ടിനസ് പറയുന്നു.

അർജന്റീനയുടെ സൂപ്പർ ഗോൾകീപ്പറായ മാർട്ടിനസ് നിലവിൽ ഇന്ത്യയിലാണ് ഉള്ളത്. മൂന്ന് ദിവസത്തെ സന്ദർശനത്തിനാണ് അദ്ദേഹം കൊൽക്കത്തയിൽ എത്തിയിട്ടുള്ളത്. ഗംഭീര വരവേൽപ്പാണ് ഈ ഗോൾകീപ്പർക്ക് കൊൽക്കത്തയിൽ ലഭിച്ചിട്ടുള്ളത്. നേരത്തെ ബംഗ്ലാദേശിലും വലിയ വരവേൽപ്പ് എമിലിയാനോ മാർട്ടിനസിന് ലഭിച്ചിരുന്നു.

ഏതായാലും ഇന്നലത്തെ ഒരു പ്രോഗ്രാമിനിടെ ചില കാര്യങ്ങൾ ഈ അർജന്റീന ഗോൾകീപ്പർ പറഞ്ഞിട്ടുണ്ട്.ഇന്ത്യയിൽ എത്താൻ കഴിഞ്ഞതിൽ അദ്ദേഹം വളരെയധികം സന്തോഷം പ്രകടിപ്പിച്ചിട്ടുണ്ട്. മാത്രമല്ല ലയണൽ മെസ്സിയെ ഇന്ത്യയിലേക്ക് കൊണ്ടുവരാൻ താനാഗ്രഹിക്കുന്നുവെന്നും എമി മാർട്ടിനസ് കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ മുണ്ടോ ആൽബിസെലാസ്റ്റ റിപ്പോർട്ട് ചെയ്യുന്നത് ഇങ്ങനെയാണ്.

” ഇന്ത്യയിലേക്ക് എത്താൻ കഴിഞ്ഞത് എന്നെ സംബന്ധിച്ചിടത്തോളം ഒരു സ്വപ്ന സാക്ഷാത്കാരമാണ്.ഈ തെരുവുകളിലൂടെ നടക്കുമ്പോഴും കാറിൽ യാത്ര ചെയ്യുമ്പോഴും ഈ രാജ്യം എത്ര മനോഹരമാണെന്ന് ഞാൻ മനസ്സിലാക്കുന്നു.ഇവിടെ എത്താൻ കഴിഞ്ഞതിൽ എനിക്ക് വളരെയധികം സന്തോഷമുണ്ട്.എല്ലാ ആരാധകരോടും ഞാൻ നന്ദി പറയുന്നു. ഇത് ഇവിടം കൊണ്ട് അവസാനിച്ചിട്ടില്ല. എന്തെന്നാൽ ലയണൽ മെസ്സിയെ ഇന്ത്യയിലേക്ക് കൊണ്ടുവരാൻ ഞാൻ ആഗ്രഹിക്കുന്നുണ്ട് ” ഇതാണ് എമിലിയാനോ മാർട്ടിനസ് പറഞ്ഞിട്ടുള്ളത്.

കഴിഞ്ഞ ഖത്തർ വേൾഡ് കപ്പിൽ അസാധാരണമായ പ്രകടനം പുറത്തെടുത്ത താരമാണ് എമി മാർട്ടിനസ്.നെതർലാന്റ്സ്,ഫ്രാൻസ് എന്നിവർക്കെതിരെയുള്ള മത്സരങ്ങളിൽ ഇദ്ദേഹത്തിന്റെ മാനസാന്നിധ്യമാണ് അർജന്റീനയെ രക്ഷിച്ചത്. വേൾഡ് കപ്പിലെ ഗോൾഡൻ ഗ്ലവ് അവാർഡും ഫിഫ ബെസ്റ്റ് പുരസ്കാരവും ഇദ്ദേഹം സ്വന്തമാക്കിയിട്ടുണ്ട്.