മെസ്സിയുടെ കാര്യത്തിൽ ആരാധകർക്ക് സന്തോഷം നൽകുന്ന പ്രസ്താവനയുമായി സ്കലോണി!

സൂപ്പർ താരം ലയണൽ മെസ്സി തന്റെ കരിയറിലെ ഏറ്റവും മനോഹരമായ സമയത്തിലൂടെയാണ് ഇപ്പോൾ കടന്നു പോയിക്കൊണ്ടിരിക്കുന്നത്.വേൾഡ് കപ്പ് കിരീടം നേടാൻ ഇപ്പോൾ മെസ്സിക്ക് സാധിച്ചിട്ടുണ്ട്. ഇനി മെസ്സിയെ സംബന്ധിച്ചിടത്തോളം അദ്ദേഹത്തിന് ഒന്നും നേടാനില്ല. ഖത്തർ വേൾഡ് കപ്പ് തന്റെ കരിയറിലെ അവസാനത്തെ വേൾഡ് കപ്പ് ആയിരിക്കുമെന്നുള്ളത് മെസ്സി നേരത്തെ അറിയിച്ച കാര്യമാണ്.

പക്ഷേ ലയണൽ മെസ്സി അടുത്ത വേൾഡ് കപ്പിലും കളിക്കാൻ ആരാധകർ ഒന്നടങ്കം ആഗ്രഹിക്കുന്നുണ്ട്. ഈ വിഷയത്തിൽ അർജന്റീനയുടെ പരിശീലകനായ ലയണൽ സ്കലോണി ആരാധകർക്ക് സന്തോഷം നൽകുന്ന ഒരു കാര്യം പറഞ്ഞിട്ടുണ്ട്. അതായത് അടുത്ത വേൾഡ് കപ്പ് കളിക്കാൻ മെസ്സിക്ക് സാധിക്കുമെന്നും അദ്ദേഹത്തിന് വേണ്ടി അർജന്റീനയുടെ വാതിലുകൾ എപ്പോഴും തുറന്നു കിടക്കും എന്നുമായിരുന്നു സ്കലോണി പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട്‌ ചെയ്യുന്നത് ഇങ്ങനെയാണ്.

” അടുത്ത വേൾഡ് കപ്പിലും കളിക്കാൻ ലയണൽ മെസ്സിക്ക് സാധിക്കുമെന്നാണ് ഞാൻ കരുതുന്നത്.പക്ഷേ ലയണൽ മെസ്സി എന്ത് ആഗ്രഹിക്കുന്നു,അദ്ദേഹത്തിന്റെ അപ്പോഴത്തെ അവസ്ഥകൾ എങ്ങനെയാണ്, അദ്ദേഹം നല്ല രൂപത്തിലാണോ എന്നുള്ളതൊക്കെ ആശ്രയിച്ചാണ് അതുണ്ടാവുക.ലയണൽ മെസ്സിക്ക് വേണ്ടി അർജന്റീനയുടെ വാതിലുകൾ എപ്പോഴും തുറന്നു കിടക്കും. നിലവിൽ അദ്ദേഹം കളിക്കളത്തിനകത്ത് ഹാപ്പിയാണ്. അദ്ദേഹം തുടരുകയാണെങ്കിൽ അത് ഞങ്ങൾക്ക് മികച്ച ഒരു കാര്യമാണ് ” സ്കലോണി പറഞ്ഞു.

അർജന്റീനയും ഫ്രാൻസും തമ്മിൽ നടന്ന ഫൈനൽ മത്സരം തന്റെ കരിയറിലെ അവസാനത്തെ വേൾഡ് കപ്പ് മത്സരമാണ് എന്നുള്ളത് മെസ്സി പറഞ്ഞിരുന്നു. ഇനി മെസ്സി വേൾഡ് കപ്പിന്റെ കാര്യത്തിലെ തീരുമാനം മാറ്റുമോ എന്നുള്ളത് കാത്തിരുന്നു കാണേണ്ട കാര്യമാണ്.2026-ലെ വേൾഡ് കപ്പിൽ മെസ്സി ഉണ്ടാവണമെന്ന് തന്നെയാണ് ആരാധകർ ആഗ്രഹിക്കുന്നത്.