മെസ്സിയുടെ അടുത്ത് പോലും നിൽക്കുന്ന ഒരു താരത്തെ ഞാനിത് വരെ കണ്ടിട്ടില്ല : അഗ്വേറോ

ഒരുപാട് കാലം ലയണൽ മെസ്സിക്കൊപ്പം കളിച്ചിട്ടുള്ള താരമാണ് സെർജിയോ അഗ്വേറോ.അർജന്റീനക്കൊപ്പം അണ്ടർ 20 വേൾഡ് കപ്പും ഒളിമ്പിക് ഗോൾഡ് മെഡലുമൊക്കെ മെസ്സിയും അഗ്വേറോയും ഒരുമിച്ചാണ് നേടിയെടുത്തത്. വളരെ കാലമായി നീണ്ടുനിൽക്കുന്ന ഒരു സുഹൃദ്ബന്ധമാണ് മെസ്സിയും അഗ്വേറോയും തമ്മിലുള്ളത്.

ഏതായാലും തന്റെ ഉറ്റസുഹൃത്തായ ലയണൽ മെസ്സിയെ കുറിച്ചുള്ള ചില കാര്യങ്ങൾ അഗ്വേറോ പങ്കുവെച്ചിട്ടുണ്ട്.അതായത് 15 വർഷത്തോളം താൻ യൂറോപ്പിൽ കളിച്ചുവെന്നും പ്രതിഭയുടെ കാര്യത്തിൽ മെസ്സിയുടെ അടുത്തുപോലും നിൽക്കുന്ന ഒരു താരത്തെ താനിതുവരെ കണ്ടിട്ടില്ല എന്നുമാണ് അഗ്വേറോ പറഞ്ഞിട്ടുള്ളത്. കഴിഞ്ഞദിവസം പ്രമുഖ അർജന്റൈൻ മാധ്യമമായ TYC സ്പോർട്സിനോട് സംസാരിക്കുകയായിരുന്നു താരം.അഗ്വേറോയുടെ വാക്കുകൾ ഇങ്ങനെയാണ്.

” അദ്ദേഹം കളിക്കുന്ന കാലത്തോളം,മെസ്സിയെ വ്യക്തിയായും താരമായും പരിശീലനത്തിലും കണ്ട ആരോട് വേണമെങ്കിലും നിങ്ങൾക്ക് ചോദിക്കാം,മെസ്സി എത്രത്തോളം അത്ഭുതപ്പെടുത്തുന്ന താരമായിരുന്നുവെന്ന്.ഞങ്ങൾക്ക് ഒരുപാട് ബുദ്ധിമുട്ടുകൾ അനുഭവപ്പെടുന്ന കാര്യങ്ങൾ മെസ്സി എത്ര ലളിതമായാണ് കൈകാര്യം ചെയ്തിരുന്നത്. ഞാൻ 15 വർഷത്തിനു മുകളിൽ യൂറോപ്പിൽ കളിച്ചിട്ടുണ്ട്. ഞാനദ്ദേഹത്തെ പോലൊരു താരത്തെ കണ്ടിട്ടില്ല, അതിന്റെ അടുത്തു പോലും നിൽക്കുന്ന താരത്തെ പോലും കണ്ടിട്ടില്ല. ഞങ്ങൾ പരിശീലനത്തിൽ കളിക്കുമ്പോൾ,മെസ്സിക്ക് വേണമെങ്കിൽ രണ്ട് മിനുട്ടിനിടെ അഞ്ചു ഗോളുകൾ നേടാൻ കഴിയുമെന്ന് ഞങ്ങൾക്ക് എല്ലാവർക്കുമറിയാം. ചുരുങ്ങിയത് ഒരു മൂന്ന് ഗോളിനെങ്കിലും മെസ്സിയെ പിടിച്ചുനിർത്താനാണ് ഞങ്ങൾ ശ്രമിക്കാറുള്ളത്. അത്തരത്തിലുള്ള മത്സരങ്ങൾ വിജയിക്കൽ അസാധ്യമായിരുന്നു. എന്തെന്നാൽ മെസ്സി എല്ലാത്തിനും മുകളിലായിരുന്നു ” ഇതാണ് അഗ്വേറോ പറഞ്ഞത്.

മെസ്സിക്കൊപ്പം ക്ലബ്ബിൽ കളിക്കുക എന്ന ആഗ്രഹത്തോടുകൂടിയായിരുന്നു അഗ്വേറോ ബാഴ്സയിൽ എത്തിയത്. എന്നാൽ മെസ്സി ക്ലബ്ബ് വിടാൻ നിർബന്ധിതനാവുകയായിരുന്നു.അതിന് ശേഷമാണ് അഗ്വേറോ ആരോഗ്യപ്രശ്നങ്ങൾ കാരണം ഫുട്ബോളിനോട് വിടചൊല്ലിയത്.