മെസ്സിക്ക് വേണ്ടി പോരാടുന്ന സിംഹങ്ങളാണ് ഞങ്ങൾ : എമി മാർട്ടിനെസ്!

കഴിഞ്ഞ ഫൈനലിസിമ പോരാട്ടത്തിൽ ഇറ്റലിയെ പരാജയപ്പെടുത്തിക്കൊണ്ട് കിരീടം ചൂടാൻ അർജന്റീനക്ക് സാധിച്ചിരുന്നു. എതിരില്ലാത്ത മൂന്ന് ഗോളുകൾക്കായിരുന്നു അർജന്റീന ഇറ്റലിയെ പരാജയപ്പെടുത്തിയത്. മത്സരത്തിൽ മിന്നുന്ന പ്രകടനമായിരുന്നു അർജന്റീന പുറത്തെടുത്തത്. സൂപ്പർ താരം ലയണൽ മെസ്സി ഉൾപ്പടെയുള്ളവർ മികച്ച പ്രകടനമാണ് മത്സരത്തിൽ നടത്തിയത്.

ഏതായാലും നിലവിലെ അർജന്റൈൻ ടീമിനെ ഗോൾകീപ്പറായ എമി മാർട്ടിനെസ് വാനോളം പ്രശംസിച്ചിട്ടുണ്ട്. അതായത് മെസ്സിക്ക് വേണ്ടി പോരാടുന്ന സിംഹങ്ങളാണ് തങ്ങൾ എന്നാണ് എമി മാർട്ടിനെസ് പറഞ്ഞിട്ടുള്ളത്. കഴിഞ്ഞ ദിവസം TUDN എന്ന മാധ്യമത്തോട് സംസാരിക്കുകയായിരുന്നു അദ്ദേഹം. എമിയുടെ വാക്കുകൾ ഇങ്ങനെയാണ്.

” ഒരു വർഷം മുമ്പ് ഞങ്ങൾ ഒന്നുമല്ലായിരുന്നു. പക്ഷേ ഞങ്ങൾ ഇപ്പോൾ വേൾഡ് കപ്പിലെ ഫേവറേറ്റുകളാണ്. കാരണം ഞങ്ങൾ കിരീടങ്ങൾ നേടിയിരിക്കുന്നു. ഞങ്ങൾ എപ്പോഴും വേൾഡ് കപ്പിലെ കാൻഡിഡേറ്റുകൾ തന്നെയാണ്. കാരണം ലോകത്തിലെ ഏറ്റവും മികച്ച താരമായ മെസ്സി ഞങ്ങളോടൊപ്പമാണ്. അദ്ദേഹത്തിന് വേണ്ടി പോരാടുന്ന സിംഹങ്ങളാണ് ഞങ്ങൾ. ഫൈനലിസിമ ഒരു അന്താരാഷ്ട്ര കിരീടമാണ്.അത് യുവേഫ തന്നെ അറിയിച്ച കാര്യമാണ്. യൂറോപ്പിലെ ഏറ്റവും മികച്ച ടീമിനെയല്ല ഞങ്ങൾ നേരിട്ടത് എന്നാണ് പലരും പറയുന്നത്. പക്ഷേ അവരാണ് യൂറോ കപ്പ് നേടിയത്. ഞങ്ങൾ എല്ലാവരുടെയും ലെവലിൽ ഉള്ളതാണ് എന്നുള്ളത് ഞങ്ങൾ തെളിയിച്ചു കഴിഞ്ഞു ” ഇതാണ് എമി മാർട്ടിനെസ് പറഞ്ഞത്.

സമീപകാലത്ത് മികച്ച പ്രകടനമാണ് അർജന്റീന നടത്തുന്നത്. കഴിഞ്ഞ 32 മത്സരങ്ങളിൽ ഒന്നിൽ പോലും അർജന്റീന പരാജയം അറിഞ്ഞിട്ടില്ല.