മെസ്സിക്കറിയില്ല താൻ മെസ്സിയാണെന്ന്: കക്ക

കഴിഞ്ഞ കോപ്പ അമേരിക്ക ഫൈനലിൽ കൊളംബിയയെ തോൽപ്പിച്ചുകൊണ്ട് കിരീടം നിലനിർത്താൻ അർജന്റീനക്ക് സാധിച്ചിരുന്നു. ഇതോടുകൂടി ലയണൽ മെസ്സി ഒരു റെക്കോർഡ് സ്വന്തമാക്കുകയും ചെയ്തു. ഫുട്ബോൾ ചരിത്രത്തിൽ ഏറ്റവും കൂടുതൽ കിരീടങ്ങൾ ഉള്ള താരം എന്ന റെക്കോർഡാണ് മെസ്സി സ്വന്തമാക്കിയിട്ടുള്ളത്. 45 കിരീടങ്ങളാണ് മെസ്സി സ്വന്തമാക്കിയിട്ടുള്ളത്.

മത്സരം പൂർത്തിയാക്കാൻ താരത്തിന് കഴിഞ്ഞിരുന്നില്ല.പരിക്ക് കാരണം അദ്ദേഹം പിൻവാങ്ങുകയായിരുന്നു.മത്സരം പൂർത്തിയാക്കാൻ സാധിക്കാത്തതിന്റെ സങ്കടത്താൽ മെസ്സി കരയുകയും ചെയ്തിരുന്നു. ഇതേക്കുറിച്ച് ബ്രസീലിയൻ ഇതിഹാസമായ കക്ക ചില കാര്യങ്ങൾ പറഞ്ഞിട്ടുണ്ട്. ലയണൽ മെസ്സിയുടെത് ഒരു മികച്ച മെന്റാലിറ്റിയാണെന്നും താൻ മെസ്സിയാണ് എന്നുള്ള കാര്യം മെസ്സി ഇപ്പോഴും തിരിച്ചറിഞ്ഞിട്ടില്ലെന്നും കക്ക പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” മെസ്സി നിർബന്ധമായും അദ്ദേഹത്തിന്റെ തല ഉയർത്തണം. എന്നിട്ട് അദ്ദേഹം സ്വയം തിരിച്ചറിയുകയും വേണം. പലരും പറഞ്ഞതുപോലെ മെസ്സിക്ക് താനാണ് മെസ്സി എന്നത് അറിയില്ല. ഇന്നത്തെ മത്സരത്തിൽ അതാണ് കണ്ടത്. വേൾഡ് കപ്പും ബാലൺഡി’ഓറുകളും ഒരുപാട് കിരീടങ്ങളും ഉള്ള വ്യക്തിയാണ് മെസ്സി.എന്നിട്ടും ഫൈനൽ പൂർത്തിയാക്കാൻ സാധിക്കാത്തതിന്റെ പേരിൽ അദ്ദേഹം കരയുകയായിരുന്നു. അത് മികച്ച ഒരു മെന്റാലിറ്റി ആണ്.ആരാധകർ ചെയ്തത് മറക്കാനാവാത്ത ഒരു കാര്യമാണ്.അർജന്റീന ആരാധകർ മാത്രമല്ല,കൊളംബിയ ആരാധകർ പോലും അദ്ദേഹം കരയുന്ന സമയത്ത് മെസ്സിയുടെ പേര് ചാന്റ് ചെയ്യുന്നുണ്ട്.അത് തീർച്ചയായും അഭിമാനിക്കാവുന്ന കാര്യമാണ്. ലോകമെമ്പാടുമുള്ള സ്നേഹം പിടിച്ചുപറ്റാൻ ലിയോ മെസ്സിക്ക് സാധിച്ചിട്ടുണ്ട് ” ഇതാണ് കക്ക പറഞ്ഞിട്ടുള്ളത്

അർജന്റീനയോടൊപ്പം 4 കിരീടങ്ങൾ പൂർത്തിയാക്കാൻ ഇപ്പോൾ ലയണൽ മെസ്സിക്ക് സാധിച്ചിട്ടുണ്ട്. അടുത്തവർഷം സ്പെയിനിനെതിരെയുള്ള ഫൈനലിസിമയിലും മെസ്സി ഉണ്ടാകും എന്നാണ് പ്രതീക്ഷിക്കപ്പെടുന്നത്.അതിനുശേഷം 2026 ലാണ് വേൾഡ് കപ്പ് നടക്കുന്നത്.ആ വേൾഡ് കപ്പിലും മെസ്സി പങ്കെടുത്തേക്കും.