ചാമ്പ്യൻമാരുടെ ആഘോഷം!റൊസാരിയോയിൽ മെസ്സിയുടെ വമ്പൻ പാർട്ടി!

ഖത്തർ വേൾഡ് കപ്പ് കിരീടം നേടിയതിന്റെ ആഘോഷം ഇപ്പോഴും അർജന്റീനയിൽ അവസാനിച്ചിട്ടില്ല. അർജന്റീനയുടെ പല താരങ്ങളും ഇപ്പോഴും ആവേശത്തിലാണ്. പക്ഷേ ക്ലബ്ബ് ഫുട്ബോൾ പുനരാരംഭിച്ചതിനാൽ ഒട്ടുമിക്ക താരങ്ങൾക്കും മടങ്ങേണ്ടി വന്നിരുന്നു.

അതേസമയം അർജന്റീനയുടെ നായകനായ ലയണൽ മെസ്സി ഇന്നലെ റൊസാരിയോയിൽ ഒരു വമ്പൻ പാർട്ടി സംഘടിപ്പിച്ചിരുന്നു. ചാമ്പ്യന്മാരുടെ ആഘോഷം എന്നാണ് ഇതിന് പേര് നൽകിയിരിക്കുന്നത്. റൊസാരിയോയിലെ ഒരു ഹോട്ടലിൽ വെച്ചാണ് ഈ ആഘോഷ പരിപാടികൾ സംഘടിപ്പിച്ചിരുന്നത്. മെസ്സിയുടെ വിവാഹം നടന്ന അതേ ഹോട്ടൽ തന്നെയാണ് ഈ ചാമ്പ്യന്മാരുടെ ആഘോഷത്തിന് വേദിയായിട്ടുള്ളത്.

അർജന്റീന സൂപ്പർതാരങ്ങളായ എയ്ഞ്ചൽ ഡി മരിയ,ലിയാൻഡ്രോ പരേഡസ് എന്നിവർ ഈ പാർട്ടിയിൽ പങ്കെടുത്തിരുന്നു. ബാക്കിയുള്ള താരങ്ങളെല്ലാം തങ്ങളുടെ ക്ലബ്ബുകളിലേക്ക് മടങ്ങിയതിനാൽ പങ്കെടുക്കാൻ സാധിച്ചിരുന്നില്ല.ഇന്നലെ രാത്രി 10 മണിയോടുകൂടിയാണ് മെസ്സി ഈ ഹോട്ടലിൽ എത്തിച്ചേർന്നിരുന്നത്. മെസ്സിയുടെ കുടുംബാംഗങ്ങൾ എല്ലാവരും ഈ പാർട്ടിയിൽ പങ്കെടുക്കുകയും ചെയ്തിരുന്നു.

ഏതായാലും ലിയോ മെസ്സി കുടുംബത്തോടൊപ്പം ന്യൂ ഇയർ ആഘോഷിച്ചതിനുശേഷം ആണ് പിഎസ്ജിയിലേക്ക് മടങ്ങുക. ജനുവരി രണ്ടാം തീയതി അഥവാ തിങ്കളാഴ്ച മെസ്സി പിഎസ്ജിക്കൊപ്പം പരിശീലനം നടത്തുമെന്നാണ് പ്രതീക്ഷിക്കപ്പെടുന്നത്.വേൾഡ് കപ്പിൽ തകർപ്പൻ പ്രകടനം നടത്തിയ മെസ്സി ഗോൾഡൻ ബോൾ പുരസ്കാരം സ്വന്തമാക്കിയിരുന്നു.പിഎസ്ജിയിലും ഈ മികവ് തുടരുമെന്ന് തന്നെയാണ് ആരാധകർ പ്രതീക്ഷിക്കുന്നത്.