കാനഡയെ തകർത്തു, വിജയിച്ചു കൊണ്ട് തുടങ്ങി മെസ്സിയും അർജന്റീനയും!
ഇന്ന് കോപ്പ അമേരിക്കയിൽ നടന്ന ആദ്യ മത്സരത്തിൽ വിജയം സ്വന്തമാക്കാൻ അർജന്റീനക്ക് സാധിച്ചിട്ടുണ്ട്. എതിരില്ലാത്ത രണ്ട് ഗോളുകൾക്കാണ് അർജന്റീന കാനഡയെ പരാജയപ്പെടുത്തിയിട്ടുള്ളത്. സൂപ്പർ താരങ്ങളായ ഹൂലിയൻ ആൽവരസ്,ലൗറ്ററോ എന്നിവർ നേടിയ ഗോളുകളാണ് അർജന്റീനക്ക് വിജയം സമ്മാനിച്ചിട്ടുള്ളത്. ഇതോടെ വിലപ്പെട്ട മൂന്ന് പോയിന്റുകൾ അർജന്റീന സ്വന്തമാക്കി കഴിഞ്ഞു.
മത്സരത്തിന്റെ ആദ്യ പകുതിയിൽ മികച്ച പ്രകടനം തന്നെയാണ് അർജന്റീന നടത്തിയത്.എന്നാൽ ഗോളുകൾ ഒന്നും നേടാൻ അവർക്ക് സാധിച്ചില്ല. ഇടയ്ക്കിടെ കൗണ്ടറുകൾ നടത്തിക്കൊണ്ട് കാനഡ അർജന്റീനയെ വിറപ്പിക്കുകയും ചെയ്തു. പക്ഷേ രണ്ടാം പകുതിയുടെ ആദ്യത്തിൽ തന്നെ ഹൂലിയൻ ആൽവരസ് അർജന്റീനക്ക് ലീഡ് നേടിക്കൊടുത്തു.മാക്ക് ആല്ലിസ്റ്ററുടെ അസിസ്റ്റിൽ നിന്നാണ് ആൽവരസ് ഗോൾ കണ്ടെത്തിയത്.
പിന്നീട് മത്സരത്തിന്റെ അവസാനത്തിൽ ലൗറ്ററോ കൂടി ഗോൾ സ്വന്തമാക്കുകയായിരുന്നു. ലയണൽ മെസ്സിയുടെ അസിസ്റ്റിൽ നിന്നായിരുന്നു ഗോൾ പിറന്നിരുന്നത്.ഇതോടെ അർജന്റീന വിജയം ഉറപ്പിച്ചു. മത്സരത്തിൽ അർജന്റീന തന്നെയാണ് ആധിപത്യം പുലർത്തിയത്. എന്നാൽ ലയണൽ മെസ്സി 2 ഗോൾഡൻ ചാൻസുകൾ പാഴാക്കിയത് അദ്ദേഹത്തിന് ആരാധകർക്കും നിരാശ നൽകി.ലൗറ്ററോയും ഒരു സുവർണ്ണാവസരം പാഴാക്കിയിരുന്നു.
എന്നിരുന്നാലും മിന്നുന്ന പ്രകടനമാണ് അർജന്റീന നടത്തിയിട്ടുള്ളത്. ഇനി അടുത്ത മത്സരത്തിൽ അർജന്റീനയുടെ എതിരാളികൾ ചിലിയാണ്. ആ മത്സരത്തിൽ കൂടി വിജയിച്ചാൽ അടുത്ത റൗണ്ട് ഉറപ്പിക്കാൻ മെസ്സിക്കും സംഘത്തിനും സാധിക്കും.
