എല്ലാവർക്കും അർജന്റീനയെ തോൽപ്പിക്കണം, എല്ലാവരെക്കാളും മുകളിൽ ഞങ്ങൾ തന്നെ:കെംപസ്

കോപ്പ അമേരിക്കയിലെ ആദ്യ മത്സരത്തിനു വേണ്ടി അർജന്റീന ഇന്ന് കളത്തിലേക്ക് ഇറങ്ങുകയാണ്.എതിരാളികൾ കാനഡയാണ്. നാളെ പുലർച്ചെ ഇന്ത്യൻ സമയം 5:30നാണ് ഈയൊരു മത്സരം നടക്കുക. നിലവിലെ കോപ്പ ജേതാക്കളും വേൾഡ് കപ്പ് ജേതാക്കളും അർജന്റീനയാണ്. ഒരു മികച്ച വിജയത്തോടുകൂടി അർജന്റീന തുടക്കം കുറിക്കും എന്നാണ് ആരാധകർ പ്രതീക്ഷിക്കുന്നത്.

1978ൽ അർജന്റീനയോടൊപ്പം ലോക കിരീടം നേടിയ ഇതിഹാസമാണ് മരിയോ കെംപസ്. അർജന്റീനയുടെ ഇത്തവണത്തെ സാധ്യതകളെക്കുറിച്ച് അദ്ദേഹം സംസാരിച്ചിട്ടുണ്ട്. എല്ലാവരെക്കാളും മുകളിൽ അർജന്റീന തന്നെയാണ് എന്നാണ് അദ്ദേഹം പറഞ്ഞിട്ടുള്ളത്. ലോക ചാമ്പ്യന്മാരായ അർജന്റീനയെ തോൽപ്പിക്കാൻ എല്ലാ ടീമുകളും ആഗ്രഹിക്കുന്നുവെന്നും കെംപസ് പറഞ്ഞിട്ടുണ്ട്. അദ്ദേഹത്തിന്റെ വാക്കുകളെ Tyc സ്പോർട്സ് റിപ്പോർട്ട് ചെയ്തിരിക്കുന്നത് ഇങ്ങനെയാണ്.

” വളരെ എളുപ്പത്തിൽ നേടാൻ കഴിയുന്ന ഒരു ചാമ്പ്യൻഷിപ്പും ഇവിടെയില്ല.എല്ലാം ബുദ്ധിമുട്ടുള്ള കോമ്പറ്റീഷനുകളാണ്. കോപ്പ അമേരിക്കയിൽ കളിക്കുന്ന എല്ലാ ടീമുകൾക്കും അർജന്റീനയെ പരാജയപ്പെടുത്തണം.കാരണം ഞങ്ങളാണല്ലോ ലോക ചാമ്പ്യന്മാർ. പക്ഷേ ഞാൻ വിശ്വസിക്കുന്നത് എല്ലാവരെക്കാളും മുകളിൽ അർജന്റീന തന്നെയാണ് ഉള്ളത് എന്നാണ്.രണ്ടോ മൂന്നോ സ്റ്റെപ്പ് മുന്നിലാണ് അർജന്റീന. നിലവിൽ അർജന്റീന ദേശീയ ടീമിന് പ്രശ്നങ്ങൾ ഒന്നുമില്ല. പക്ഷേ മത്സരങ്ങൾ അപ്രവചനീയമാണ് എന്നത് നമുക്കറിയാമല്ലോ ” ഇതാണ് അർജന്റൈൻ ഇതിഹാസം പറഞ്ഞിട്ടുള്ളത്.

ടൂർണമെന്റിലെ ഏറ്റവും വലിയ കിരീട ഫേവറേറ്റുകൾ അർജന്റീന തന്നെയാണ്. പക്ഷേ ബ്രസീലും കൊളംബിയയും ഉറുഗ്വയുമെല്ലാം ശക്തർ തന്നെയാണ്. എന്നാൽ ഫൈനൽ വരെ അർജന്റീനക്ക് കാര്യമായ വെല്ലുവിളികൾ നേരിടേണ്ടി വരില്ല. അതുകൊണ്ടുതന്നെ ഫൈനലിൽ അർജന്റീന ഉണ്ടാകുമെന്ന് തന്നെയാണ് ആരാധകർ അടിയുറച്ച് വിശ്വസിക്കുന്നത്