എമി എഫക്ട്..!അർജന്റൈൻ സൂപ്പർ താരം പെനാൽറ്റി പാഴാക്കി, പരിഹസിച്ച് ബ്രസീലിയൻ ഗോളി!

ഖത്തർ വേൾഡ് കപ്പിൽ തകർപ്പൻ പ്രകടനം നടത്താൻ അർജന്റീനയുടെ ഗോൾ കീപ്പറായ എമിലിയാനോ മാർട്ടിനെസ്സിന് സാധിച്ചിരുന്നു. എന്നാൽ അദ്ദേഹത്തിന്റെ സെലിബ്രേഷനുകൾ ഫുട്ബോൾ ലോകത്ത് വലിയ ചർച്ചാവിഷയമാണ്. താരം നടത്തിയ സെലിബ്രേഷനുകളുടെ കാര്യത്തിൽ ഇപ്പോഴും വ്യത്യസ്ത അഭിപ്രായങ്ങളാണ് ഉയർന്നുവരുന്നത്.

അതേസമയം കഴിഞ്ഞ ദിവസം സൗദി അറേബ്യയിൽ വെച്ച് നടക്കുന്ന കിംഗ്സ്‌ കപ്പ് പോരാട്ടത്തിൽ അൽ ശബാബും അൽ ഇത്തിഹാദും തമ്മിലുള്ള പോരാട്ടമായിരുന്നു നടന്നിരുന്നത്. നിശ്ചിത സമയത്ത് മത്സരം 1-1 എന്ന നിലയിൽ സമനിലയിൽ കലാശിക്കുകയായിരുന്നു. ഇതോടുകൂടി മത്സരം പെനാൽറ്റി ഷൂട്ടൗട്ടിലേക്ക് നീങ്ങി. അൽ ഷബാബിന്റെ അർജന്റീന സൂപ്പർതാരമായ എവർ ബനേഗ പെനാൽറ്റി പാഴാക്കുകയായിരുന്നു.

അൽ ഇത്തിഹാദിന്റെ ബ്രസീലിയൻ ഗോൾ കീപ്പറായ മാഴ്സെലോ ഗ്രോഹിന് മുന്നിൽ ഈ പെനാൽറ്റി അർജന്റൈൻ താരം പാഴാക്കുകയായിരുന്നു.അതിനുശേഷം ഈ ബ്രസീലിയൻ ഗോൾ കീപ്പർ നടത്തിയ സെലിബ്രേഷൻ ആണ് ഇപ്പോൾ ചർച്ചയായിരിക്കുന്നത്. നിരാശയോട് കൂടി ഗ്രൗണ്ടിൽ മുഖം പൊത്തി കിടക്കുന്ന എവർ ബനേഗക്ക് മുന്നിൽ വലിയ രൂപത്തിലുള്ള ആഘോഷമാണ് ഈ ബ്രസീലിയൻ ഗോൾ കീപ്പർ നടത്തിയിട്ടുള്ളത്.

തുടർന്ന് അൽ ഷബാബ് കിങ്സ് കപ്പിൽ നിന്ന് പുറത്താവുകയും ചെയ്തിരുന്നു. യഥാർത്ഥത്തിൽ മാർസെലോയുടെ ആ വലിയ സെലിബ്രേഷൻ എമി എഫക്റ്റ് ആണ് എന്നാണ് സോഷ്യൽ മീഡിയ അവകാശപ്പെടുന്നത്.എമിയുടെ സെലിബ്രേഷനുകൾ അർജന്റീന താരത്തിനെതിരെ തന്നെ ബ്രസീലിയൻ ഗോൾ കീപ്പർ അനുകരിക്കുകയായിരുന്നു എന്നാണ് പലരും കണ്ടെത്തിയിരിക്കുന്നത്. ഏതായാലും എമിയുടെ സെലിബ്രേഷനുകളുമായി ബന്ധപ്പെട്ട വിവാദങ്ങൾ ഇപ്പോഴും ഫുട്ബോൾ ലോകത്ത് ചർച്ചയായി കൊണ്ടിരിക്കുകയാണ്.