ഇത് മെസ്സിയുടെ വേൾഡ് കപ്പ്,അദ്ദേഹത്തിനായി ലൗറ്ററോ എന്തും ചെയ്യും : ഏജന്റ്!

വരുന്ന ഖത്തർ വേൾഡ് കപ്പിനെ ഏറെ പ്രതീക്ഷകളോട് കൂടിയാണ് ലാറ്റിനമേരിക്കൻ ചാമ്പ്യന്മാരായ അർജന്റീനയും ആരാധകരും ഇപ്പോൾ നോക്കി കാണുന്നത്. സൂപ്പർ താരം ലയണൽ മെസ്സിയുടെ അവസാന വേൾഡ് കപ്പായാണ് ഇതിന് വിലയിരുത്തപ്പെടുന്നത്.അത്കൊണ്ട് തന്നെ കിരീടം നേടിക്കൊണ്ട് ഈ വേൾഡ് കപ്പ് അവിസ്മരണീയമാക്കാൻ മെസ്സിക്കും സംഘത്തിനും സാധിക്കുമോ എന്നുള്ളതാണ് ആരാധകർ ഉറ്റുനോക്കുന്നത്.

ഏതായാലും വേൾഡ് കപ്പിനുള്ള അർജന്റൈൻ ടീമിനെ കുറിച്ച് സൂപ്പർതാരം ലൗറ്ററോ മാർട്ടിനസിന്റെ ഏജന്റ് ചില കാര്യങ്ങൾ ഇപ്പോൾ പങ്കുവെച്ചിട്ടുണ്ട്. അതായത് ഇത് മെസ്സിയുടെ വേൾഡ് കപ്പാണ് എന്നാണ് എല്ലാവരും വിശ്വസിക്കുന്നതെന്നും ടീമിന് വേണ്ടി ലൗറ്ററോ സാധ്യമായത് എന്തും ചെയ്യുമെന്നുമാണ് അലെജാൻഡ്രോ കമാനോ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

“അർജന്റൈൻ ടീമിനൊപ്പം കളിക്കുന്നതിനെ ലൗറ്ററോ മാർട്ടിനസ് വളരെയധികം ഇഷ്ടപ്പെടുന്നു. അവർ എല്ലാവരും മെസ്സിക്ക് പിറകിലുണ്ട്. ഞങ്ങൾ എല്ലാവരും വിശ്വസിക്കുന്നത് ഇത് മെസ്സിയുടെ വേൾഡ് കപ്പാണ് എന്നാണ്. അദ്ദേഹത്തിന്റെ ഗോളുകൾക്ക് രാജ്യത്ത് സന്തോഷം കൊണ്ടുവരാൻ സാധിക്കുമെങ്കിൽ, അത് നേടാൻ വേണ്ടി ലൗറ്ററോ സാധ്യമായ എന്തും ചെയ്യാൻ തയ്യാറാണ് ” ഇതാണ് ലൗറ്ററോയുടെ ഏജന്റ് പറഞ്ഞിട്ടുള്ളത്.

അതേസമയം താരം ഇന്റർ മിലാൻ വിടുമെന്നുള്ള അഭ്യൂഹങ്ങളോടും കമാനോ പ്രതികരിച്ചിട്ടുണ്ട്.ലൗറ്ററോ ഇന്ററിൽ ഹാപ്പിയാണെന്നും അദ്ദേഹം അവിടെ തന്നെ തുടരുമെന്നാണ് ഏജന്റ് അറിയിച്ചത്.