ഇതൊരു യുദ്ധമായിരിക്കും, മെസ്സിയുണ്ടാക്കുന്ന ബുദ്ധിമുട്ടുകളെ കുറിച്ച് ജാഗരൂകരാണ്: ഡേവിസ്

കോപ്പ അമേരിക്കയിലെ ആദ്യ മത്സരത്തിനു വേണ്ടി അർജന്റീന ഇന്ന് കളിക്കളത്തിലേക്ക് ഇറങ്ങുകയാണ്.എതിരാളികൾ കാനഡയാണ്. നാളെ പുലർച്ചെ ഇന്ത്യൻ സമയം 5:30ന് അമേരിക്കയിൽ വെച്ചുകൊണ്ടാണ് ഈ മത്സരം നടക്കുന്നത്. വിജയിച്ചു തുടങ്ങുക എന്ന ലക്ഷ്യത്തോടുകൂടിയാണ് നിലവിലെ ജേതാക്കളായ അർജന്റീന വരുന്നത്. എന്നാൽ കാനഡ ഒട്ടും നിസ്സാരക്കാരല്ല.

അൽഫോൻസോ ഡേവിസ് ഉൾപ്പെടെയുള്ള ചില സൂപ്പർതാരങ്ങൾ അവരുടെ ഭാഗമാണ്. എന്നിരുന്നാലും ലോക ചാമ്പ്യന്മാരായ അർജന്റീനക്ക് തന്നെയാണ് മത്സരത്തിനു മുൻതൂക്കമുള്ളത്. അർജന്റീനയെ കുറിച്ചും അവരുടെ ക്യാപ്റ്റൻ മെസ്സിയെ കുറിച്ചും ചില കാര്യങ്ങൾ ഡേവിസ് ഇപ്പോൾ പറഞ്ഞിട്ടുണ്ട്. ഒരു യുദ്ധത്തിനാണ് തങ്ങൾ പോകുന്നത് എന്നാണ് ഡേവിസ് പറഞ്ഞിട്ടുള്ളത്. മെസ്സി ഉണ്ടാക്കുന്ന ബുദ്ധിമുട്ടുകളെ കുറിച്ച് തങ്ങൾ ജാഗരൂകരാണെന്നും ഡേവിസ് പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇപ്രകാരമാണ്.

“ലോകത്തെ ഏറ്റവും മികച്ച ടീം ഇന്ന് അർജന്റീനയാണ്. അവർക്കെതിരെ കളിക്കുക എന്നുള്ളത് തന്നെ ഒരു യുദ്ധമായിരിക്കും. ഞങ്ങളുടെ മെന്റാലിറ്റി വളരെയധികം കരുത്തുറ്റത്താണ്. ചാമ്പ്യന്മാർക്കെതിരെ എല്ലാം സമർപ്പിച്ചുകൊണ്ട് ഞങ്ങൾ കളിക്കും. അവർക്കെതിരെ കളിക്കുന്നു എന്നുള്ളത് തന്നെ ഞങ്ങൾക്കൊരു മോട്ടിവേഷൻ ആണ്. പല രീതിയിലും ഞങ്ങൾക്ക് ലയണൽ മെസ്സി ഉണ്ടാക്കാവുന്ന ബുദ്ധിമുട്ടുകളെക്കുറിച്ച് ഞങ്ങൾ ജാഗരൂകരാണ് “ഇതാണ് അൽഫോൻസോ ഡേവിസ് പറഞ്ഞിട്ടുള്ളത്.

അൽഫോൻസോ ഡേവിസിനെ കൂടാതെ ലില്ലി സ്ട്രൈക്കറായ ജൊനാതൻ ഡേവിഡും കാനഡയുടെ താരമാണ്.കഴിഞ്ഞ സൗഹൃദ മത്സരത്തിൽ ഫ്രാൻസിനെ ഗോൾ രഹിത സമനിലയിൽ തളക്കാൻ കാനഡക്ക് കഴിഞ്ഞിരുന്നു. അന്ന് അവരുടെ ഗോൾകീപ്പറായ മാക്സിമേ ക്രിപൂ മിന്നുന്ന പ്രകടനമായിരുന്നു നടത്തിയിരുന്നത്. ഈ താരങ്ങൾ ഒക്കെ തന്നെയും അർജന്റീനക്ക് വെല്ലുവിളികളായിരിക്കും സൃഷ്ടിക്കുക.