അർജന്റൈൻ താരത്തിന് വേണ്ടി വമ്പൻമാർ, ഓഫർ നിരസിച്ച് താരത്തിന്റെ ക്ലബ്!

കോപ്പ അമേരിക്ക ഫൈനലിൽ അർജന്റൈൻ ആരാധകരുടെ മനം കവർന്ന താരങ്ങളിൽ ഒരാളാണ് ഗോൺസാലോ മോണ്ടിയേൽ.ബ്രസീലിനെതിരെയുള്ള മത്സരത്തിൽ രക്തമൊലിക്കുന്ന കാലുകളോടെയായിരുന്നു താരം കളിച്ചിരുന്നത്. തുടർന്ന് കോപ്പ അമേരിക്ക ജേതാവാകാനും മോണ്ടിയേലിന് സാധിച്ചിരുന്നു. ഇപ്പോഴിതാ താരത്തെ സ്വന്തമാക്കാൻ വേണ്ടി പോർച്ചുഗീസ് വമ്പൻമാരായ ബെൻഫിക്ക രംഗത്ത് വന്നിട്ടുണ്ട്.24-കാരനായ താരത്തിന് വേണ്ടി ബെൻഫിക്ക ഒരു ഓഫർ നൽകിയിരുന്നു. 1.5 മില്യൺ യുറോയുടെ ഒരു വർഷത്തെ ലോണും കൂടാതെ 7 മില്യൺ യൂറോയുടെ വാങ്ങാനുള്ള ഓപ്ഷനുമായിരുന്നു ബെൻഫിക്ക വാഗ്ദാനം ചെയ്തിരുന്നത്. എന്നാൽ ഇത്‌ താരത്തിന്റെ ക്ലബായ റിവർപ്ലേറ്റ് നിരസിച്ചിട്ടുണ്ട്.ഇഎസ്പിഎന്നിനെ ഉദ്ധരിച്ചു കൊണ്ട് മുണ്ടോ ആൽബിസെലസ്റ്റയാണ് ഇക്കാര്യം റിപ്പോർട്ട്‌ ചെയ്തിരിക്കുന്നത്.

റൈറ്റ് ബാക്ക് പൊസിഷനിൽ കളിക്കുന്ന താരം കോപ്പ അമേരിക്കയിൽ മികച്ച പ്രകടനമായിരുന്നു നടത്തിയിരുന്നത്. ഇത്‌ തന്നെയാണ് ബെൻഫിക്കക്ക്‌ താരത്തിൽ താല്പര്യം ജനിക്കാൻ കാരണം. എന്നാൽ നിലവിലെ ഓഫർ റിവർപ്ലേറ്റ് നിരസിച്ച സ്ഥിതിക്ക്‌ ബെൻഫിക്ക പുതിയ ഓഫർ നൽകേണ്ടി വരും. നിലവിൽ മറ്റൊരു അർജന്റൈൻ ഡിഫൻഡറായ നിക്കോളാസ് ഓട്ടമെന്റി ബെൻഫിക്കയിലാണ് കളിക്കുന്നത്. അത്കൊണ്ട് തന്നെ മോണ്ടിയേലിനെ എത്തിക്കാൻ കഴിഞ്ഞാൽ ഇരുവരും തമ്മിലുള്ള കൂട്ടുകെട്ട് തങ്ങൾക്ക്‌ ഗുണം ചെയ്യുമെന്നാണ് ബെൻഫിക്ക വിശ്വസിക്കുന്നത്. അതേസമയം കോപ്പ അമേരിക്ക ജേതാക്കളായ അർജന്റൈൻ ടീമിലെ പല താരങ്ങൾക്കും ഇപ്പോൾ ആവിശ്യക്കാർ ഏറെയാണ്. റൊമേറോ ടോട്ടൻഹാമിലേക്ക് ചേക്കേറാൻ ഒരുങ്ങുമ്പോൾ നിക്കോളാസ് ഗോൺസാലസ് ഫിയോറെന്റിനയിൽ എത്തിയിരുന്നു.ഡി പോൾ അത്ലറ്റിക്കോയിൽ എത്തിയപ്പോൾ ലൗറ്ററോ മാർട്ടിനെസിന് വേണ്ടി പല വമ്പൻമാരും രംഗത്തുമുണ്ട്.