അർജന്റീനക്ക് വേണ്ടി റെക്കോർഡിട്ട് മെസ്സി!

ഇന്നലെ മെക്സിക്കോക്കെതിരെ നടന്ന മത്സരത്തിൽ അർജന്റീനയുടെ രക്ഷകനായി അവതരിച്ചത് ലയണൽ മെസ്സിയാണ്.മത്സരത്തിൽ മെസ്സിയുടെ ഒരു സുന്ദര ഗോൾ പിറക്കുകയായിരുന്നു.അതോടെയായിരുന്നു അർജന്റീന മത്സരത്തിലേക്ക് തിരിച്ചുവന്നത്. കൂടാതെ മെസ്സിയുടെ പാസിൽ നിന്നും എൻസോ ഒരു സുന്ദരമായ ഗോൾ നേടിയതോടെ അർജന്റീന വിജയം ഉറപ്പിക്കുകയായിരുന്നു.

ഈ മത്സരത്തിൽ അർജന്റീനക്ക് വേണ്ടി കളിച്ചതോടുകൂടി ഒരു റെക്കോർഡ് സ്വന്തമാക്കാൻ മെസ്സിക്ക് കഴിഞ്ഞിട്ടുണ്ട്. വേൾഡ് കപ്പിൽ അർജന്റീനക്ക് വേണ്ടി ഏറ്റവും കൂടുതൽ മത്സരങ്ങൾ കളിക്കുന്ന താരം എന്ന റെക്കോർഡാണ് മെസ്സി കരസ്ഥമാക്കിയിട്ടുള്ളത്.21 മത്സരങ്ങൾ കളിച്ച മെസ്സി മറഡോണക്കൊപ്പമാണ് ഈയൊരു റെക്കോർഡ് ഇപ്പോൾ പങ്കിടുന്നത്.

അടുത്ത മത്സരം കൂടി മെസ്സി കളിക്കുകയാണെങ്കിൽ ഈ റെക്കോർഡ് പൂർണമായും തന്റെ സ്വന്തം പേരിലാക്കാൻ മെസ്സിക്ക് സാധിക്കും.അതേസമയം ഗോളിന്റെ കാര്യത്തിലും ലയണൽ മെസ്സി ഇപ്പോൾ മറഡോണക്കൊപ്പം എത്തിയിട്ടുണ്ട്. 8 വേൾഡ് കപ്പ് ഗോളുകളായിരുന്നു മറഡോണ നേടിയിരുന്നത്. ലയണൽ മെസ്സി ഇപ്പോൾ എട്ട് വേൾഡ് കപ്പ് ഗോളുകൾ നേടിയിട്ടുണ്ട്.

അതേസമയം അർജന്റീനക്ക് വേണ്ടി ഏറ്റവും കൂടുതൽ വേൾഡ് കപ്പ് ഗോളുകൾ നേടിയിട്ടുള്ളത് മറ്റൊരു ഇതിഹാസമായ ഗബ്രിയേൽ ബാറ്റിസ്റ്റൂട്ടയാണ്. 10 ഗോളുകളാണ് അദ്ദേഹം നേടിയിട്ടുള്ളത്. മെസ്സിക്ക് ഈ റെക്കോർഡ് സ്വന്തം പേരിൽ ആക്കണമെങ്കിൽ 3 ഗോളുകൾ കൂടി ആവശ്യമാണ്.ഏതായാലും മെസ്സിയിൽ നിന്നും ഇനിയും ഗോളുകൾ ആരാധകർ പ്രതീക്ഷിക്കുന്നുണ്ട്.