ഈയൊരു പാഷൻ,ഈയൊരു മെന്റാലിറ്റി,അത് മറ്റെവിടെ കാണാൻ പറ്റും? ക്രിസ്റ്റ്യാനോയെ പ്രശംസകൾ കൊണ്ട് മൂടി ഫഹദ് അൽ ഒതയ്ബി

ഇന്നലെ AFC ചാമ്പ്യൻസ് ലീഗിൽ നടന്ന രണ്ടാം പാദ പ്രീ ക്വാർട്ടർ പോരാട്ടത്തിൽ വിജയം നേടാൻ അൽ നസ്റിന് സാധിച്ചിരുന്നു. എതിരില്ലാത്ത രണ്ട് ഗോളുകൾക്കാണ് മറ്റൊരു സൗദി അറേബ്യൻ ക്ലബ്ബായ അൽ ഫയ്ഹയെ അവർ പരാജയപ്പെടുത്തിയിട്ടുള്ളത്. സൂപ്പർ താരം ക്രിസ്റ്റ്യാനോ റൊണാൾഡോ,പോർച്ചുഗീസ് താരം ഒട്ടാവിയോ എന്നിവരാണ് അൽ നസ്റിന് വേണ്ടി ഗോളുകൾ നേടിയത്. ഇരു പാദങ്ങളിലുമായി അൽ ഫയ്ഹയെ എതിരില്ലാത്ത മൂന്ന് ഗോളുകൾക്ക് പരാജയപ്പെടുത്തിക്കൊണ്ട് അൽ നസ്ർ ക്വാർട്ടറിൽ പ്രവേശിക്കുകയും ചെയ്തിട്ടുണ്ട്.

ആദ്യ പാദ മത്സരത്തിൽ ക്രിസ്റ്റ്യാനോ തന്നെയായിരുന്നു അൽ നസ്റിന് വേണ്ടി ഗോൾ നേടിയിരുന്നത്.ഇന്നലെയും 39 കാരനായ ഈ താരം കോൾ കണ്ടെത്തി.മത്സരത്തിനിടെ പ്രശസ്ത കമന്റെറ്ററായ ഫഹദ് അൽ ഒത്തയ്ബി റൊണാൾഡോയെ പ്രശംസകൾ കൊണ്ട് മൂടിയിട്ടുണ്ട്. താരത്തിന്റെ മെന്റാലിറ്റിയേയും പാഷനേയുമാണ് അദ്ദേഹം പ്രശംസിച്ചിട്ടുള്ളത്.ഫഹദ് റൊണാൾഡോയെ കുറിച്ച് പറഞ്ഞത് ഇപ്രകാരമാണ്.

“ഇന്ന് ഇപ്പോൾ നോക്കൂ, മത്സരത്തിന്റെ 93 മിനിറ്റിലാണ് റൊണാൾഡോ എതിർ ഗോൾകീപ്പറിൽ പ്രഷർ ചെലുത്തുന്നത്. റൊണാൾഡോ ഇപ്പോഴും പ്രസ് ചെയ്യുകയാണ്.അൽ നസ്ർ അടുത്ത റൗണ്ടിലേക്ക് യോഗ്യത കരസ്ഥമാക്കിയിട്ടുണ്ട്,വിജയം ഉറപ്പാക്കിയിട്ടുണ്ട്, എന്നിട്ടും റൊണാൾഡോ ഈ അവസാന നിമിഷത്തിൽ പ്രസ് ചെയ്യുന്നു. ഈ താരത്തിന്റെ ഒരു പാഷൻ അത് ഒരിക്കലും അവസാനിക്കില്ല “ഇതാണ് റൊണാൾഡോയെ കുറിച്ച് ഫഹദ് പറഞ്ഞിട്ടുള്ളത്.

മാസ്മരിക പ്രകടനം ഇപ്പോഴും റൊണാൾഡോ തുടർന്ന് കൊണ്ടിരിക്കുകയാണ്. ചാമ്പ്യൻസ് ലീഗിൽ ഇതുവരെ 5 ഗോളുകളാണ് റൊണാൾഡോ കരസ്ഥമാക്കിയിട്ടുള്ളത്. അതേസമയം സൗദി അറേബ്യൻ ലീഗിൽ ഒന്നാം സ്ഥാനത്ത് തുടരുന്നത് റൊണാൾഡോയാണ്. 21 ഗോളുകളും 9 അസിസ്റ്റുകളുമാണ് താരം സ്വന്തമാക്കിയിട്ടുള്ളത്.