പരാജയത്തിന്റെ കനലുകളിൽ നിന്ന് പുതിയ പോരാട്ടത്തിലേക്ക്: അർജന്റീനയോട് പകരം ചോദിക്കാൻ ഉറച്ച് എംബപ്പേ!

2022 ഖത്തർ ലോകകപ്പിന്റെ ഫൈനൽ ഫുട്ബോൾ ചരിത്രത്തിലെ തന്നെ ഏറ്റവും ആവേശം നിറഞ്ഞ പോരാട്ടങ്ങളിലൊന്നായിരുന്നു. അർജന്റീന കിരീടമുയർത്തിയപ്പോൾ, ഫ്രാൻസിന്റെ ഹീറോ കിലിയൻ എംബപ്പേയ്ക്ക് ഫൈനലിൽ ഹാട്രിക് നേടിയിട്ടും കണ്ണീരോടെ മടങ്ങേണ്ടി വന്നു. ആ തോൽവിക്ക് ശേഷം, മറ്റൊരു ലോകകപ്പ് (FIFA World Cup 2026) പടിവാതിൽക്കൽ എത്തിനിൽക്കെ ആരാധകർ ചോദിക്കുന്ന ഒരു ചോദ്യമുണ്ട്: "വീണ്ടുമൊരു ഫ്രാൻസ് vs അർജന്റീന പോരാട്ടം വന്നാൽ എന്താവും?"

പ്രശസ്ത കായിക മാധ്യമപ്രവർത്തകൻ ഫാബ്രിസിയോ റൊമാനോ പങ്കുവെച്ച ട്വീറ്റിലൂടെ ഈ ചോദ്യത്തിന് കൃത്യമായ മറുപടി നൽകിയിരിക്കുകയാണ് ഫ്രഞ്ച് ക്യാപ്റ്റൻ കിലിയൻ എംബപ്പേ.
“എപ്പോഴത്തെയും പോലെ, ജയിക്കണമെന്ന ഉറച്ച തീരുമാനത്തിലും ആഗ്രഹത്തിലുമായിരിക്കും ഞങ്ങൾ.”

​തോൽവിയുടെ ആഴം എത്രത്തോളമുണ്ടെന്ന് എംബപ്പേയുടെ വാക്കുകളിൽ വ്യക്തമാണ്. ഖത്തറിലെ ഫൈനലിന് ശേഷം ആ മത്സരം താൻ പിന്നീട് ഒരിക്കൽ പോലും കാണാൻ തയ്യാറായിട്ടില്ലെന്ന് താരം അടുത്തിടെ തുറന്നു പറഞ്ഞിരുന്നു. ആ ഓർമ്മകൾ വീണ്ടും ഉണർത്താൻ താൻ ആഗ്രഹിക്കുന്നില്ലെന്നും, പകരം വരാനിരിക്കുന്ന ലോകകപ്പിൽ കിരീടം നേടുക എന്നത് മാത്രമാണ് തന്റെ ലക്ഷ്യമെന്നും എംബപ്പേ വ്യക്തമാക്കുന്നു.
​”ഞങ്ങൾ ഇവിടെ എത്തിയിരിക്കുന്നത് ചരിത്രം കുറിക്കാനാണ്. വരാനിരിക്കുന്ന ലോകകപ്പ് നേടുക എന്നത് തന്നെയാണ് ഞങ്ങളുടെ ലക്ഷ്യം,” എംബപ്പേ കൂട്ടിച്ചേർത്തു. ഫ്രാൻസിന്റെ ലക്ഷ്യം സെമിഫൈനൽ മാത്രമാണെന്ന തരത്തിലുള്ള ചില വാർത്തകളെയും താരം ശക്തമായി തള്ളിപ്പറഞ്ഞു.
​​നിലവിലെ ടീം കരുത്ത് പരിശോധിച്ചാൽ ലോകകപ്പിൽ ഫ്രാൻസും അർജന്റീനയും തന്നെയാണ് ഏറ്റവും ശക്തരായ രണ്ട് ടീമുകൾ. കിലിയൻ എംബപ്പേ നയിക്കുന്ന ഫ്രഞ്ച് നിരയ്ക്ക് ഏത് പ്രതിരോധ കോട്ടയും തകർക്കാനുള്ള ശേഷിയുണ്ട്. അതേസമയം ലയണൽ മെസ്സിയുടെ അർജന്റീനയും തങ്ങളുടെ കിരീടം നിലനിർത്താനുള്ള കഠിനമായ തയ്യാറെടുപ്പിലാണ്.

​ഒരു റീമാച്ചിന് കളമൊരുങ്ങിയാൽ അത് ഫുട്ബോൾ ലോകം കണ്ടതിൽ വെച്ച് ഏറ്റവും വലിയ പോരാട്ടമായിരിക്കുമെന്ന് ഉറപ്പാണ്. കഴിഞ്ഞ തവണ കൈവിട്ടുപോയ സ്വർണ്ണക്കപ്പിൽ ഇത്തവണ മുത്തമിടാൻ ഉറപ്പിച്ചാണ് എംബപ്പേ വരുന്നത്. ആ നിശ്ചയദാർഢ്യം തന്നെയാണ് ഫ്രഞ്ച് ആരാധകർക്ക് ഇപ്പോൾ വലിയ പ്രതീക്ഷ നൽകുന്നതും!