നെയ്മർ വേൾഡ് കപ്പിനുണ്ടാവണം: ആഗ്രഹം പ്രകടിപ്പിച്ച് ലയണൽ മെസ്സി
ഫുട്ബോൾ ലോകത്തെ ഉറ്റ സുഹൃത്തുക്കളാണ് ലയണൽ മെസ്സിയും നെയ്മർ ജൂനിയറും. വരാനിരിക്കുന്ന ലോകകപ്പിൽ ബ്രസീൽ താരം നെയ്മർ കളിക്കണമെന്ന തന്റെ ആഗ്രഹം തുറന്നുപറഞ്ഞിരിക്കുകയാണ് ഇപ്പോൾ അർജന്റീനയുടെ ഇതിഹാസ താരം മെസ്സി.
പൊള്ളോ അൽവാരസിന് നൽകിയ അഭിമുഖത്തിലാണ് മെസ്സി തന്റെ പ്രിയ സുഹൃത്തിനെക്കുറിച്ച് സംസാരിച്ചത്. മെസ്സിയുടെ വാക്കുകൾ ഇങ്ങനെയായിരുന്നു:
“നെയ്മർ ലോകകപ്പിൽ ഉണ്ടാവണമെന്ന് ഞാൻ ആഗ്രഹിക്കുന്നു. ലോകകപ്പ് പോലുള്ള വലിയ വേദികളിൽ ലോകത്തിലെ ഏറ്റവും മികച്ച താരങ്ങൾ കളിക്കാനുണ്ടാകണം. നെയ്മർ എന്നും മികച്ച താരങ്ങളിൽ ഒരാളാണ്. ഫുട്ബോളിനും ബ്രസീലിനും അദ്ദേഹം നൽകുന്ന സംഭാവനകൾ കണക്കിലെടുക്കുമ്പോൾ അദ്ദേഹം അവിടെ ഉണ്ടാകേണ്ടത് അത്യാവശ്യമാണ്.”
നെയ്മറുമായുള്ള തന്റെ സൗഹൃദത്തെക്കുറിച്ചും മെസ്സി വാചാലനായി. താൻ ഈ കാര്യത്തിൽ പൂർണ്ണമായും നിഷ്പക്ഷനല്ലെന്നും, ഒരു സുഹൃത്ത് എന്ന നിലയിൽ നെയ്മർക്ക് നല്ല കാര്യങ്ങൾ സംഭവിക്കണമെന്ന് താൻ ആഗ്രഹിക്കുന്നുവെന്നും അദ്ദേഹം കൂട്ടിചേർത്തു.
ബാഴ്സലോണയിലും പിഎസ്ജിയിലും ഒരുമിച്ച് കളിച്ച മെസ്സിയും നെയ്മറും തമ്മിലുള്ള സൗഹൃദം ഫുട്ബോൾ ലോകത്തിലെ പരിചിതമാണ്. 2021 കോപ്പ അമേരിക്ക ഫൈനലിൽ അർജൻറീനയോട് തോറ്റപ്പോൾ കരയുന്ന നെയ്മറെ ആശ്വസിപ്പിക്കുന്ന മെസ്സിയുടെ ചിത്രം ഇന്നും ആരാധകരുടെ മനസ്സിലുണ്ട്. പരിക്കുകൾ വലയ്ക്കുന്ന നെയ്മറുടെ തിരിച്ചുവരവിനായി കാത്തിരിക്കുന്ന ആരാധകർക്ക് മെസ്സിയുടെ ഈ വാക്കുകൾ വലിയ ആവേശമാണ് നൽകുന്നത്.
