ഫുട്ബോളിനോടുള്ള സ്നേഹമാണ് പ്രധാനം , പദവികൾ അല്ല; മെസ്സിയുടെ വെളിപ്പെടുത്തലുമായി  കസ്സാനോ

ലോകം മുഴുവൻ ലയണൽ മെസ്സിയെ ഫുട്ബോൾ ചരിത്രത്തിലെ എക്കാലത്തെയും മികച്ച താരം എന്ന് വാഴ്ത്തുമ്പോഴും, ആ പദവികളൊന്നും തന്നെ ബാധിക്കുന്നില്ലെന്ന് വ്യക്തമാക്കുകയാണ് മെസ്സി. മുൻ ഇറ്റാലിയൻ താരം അന്റോണിയോ കസ്സാനോയുമായി നടത്തിയ സംഭാഷണത്തിലാണ് മെസ്സിയുടെ വിനയവും ഫുട്ബോളിനോടുള്ള ആത്മാർത്ഥതയും വ്യക്തമാകുന്നത്.

   ഫുട്ബോൾ ചരിത്രത്തിലെ ഏറ്റവും മികച്ച താരം താനാണെന്ന് മെസ്സി തിരിച്ചറിയുന്നുണ്ടോ എന്ന കസ്സാനോയുടെ ചോദ്യത്തിന് വളരെ ലളിതമായിരുന്നു മെസ്സിയുടെ മറുപടി. “ഒന്നാമൻ ആയാലും,  രണ്ടാമൻ ആയാലും,  അഞ്ചാമൻ ആയാലും,  പത്താമൻ ആയാലും അല്ലെങ്കിൽ പതിനഞ്ചാമൻ ആയാലും അതിൽ എന്താണ് വ്യത്യാസം? ” എന്നായിരുന്നു മെസ്സിയുടെ മറുപടി. താൻ ഫുട്ബോളിനെ സ്നേഹിക്കുന്നുണ്ടെന്നും,  ആ കളിയിൽ ലഭിക്കുന്ന സന്തോഷത്തിനാണ് പ്രാധാന്യം എന്നും അദ്ദേഹം കൂട്ടിച്ചേർത്തു. സ്ഥാനങ്ങൾക്കോ, റെക്കോർഡുകൾക്കോ വേണ്ടിയല്ല മറിച്ച് കളിയോടുള്ള അഭിനിവേശം കൊണ്ടാണ് ഇന്നും മൈതാനത്തിറങ്ങുന്നതെന്ന് മെസ്സി സൂചിപ്പിക്കുന്നു. മൂന്നോ , നാലോ വർഷം കൂടി കളിക്കാൻ സാധിക്കുമോ എന്ന് ചോദിച്ച മെസ്സി , താൻ ഇത് ചെയ്യുന്നത് വിനോദത്തിന് വേണ്ടിയാണെന്നും ലോകത്തോട് പറയുന്നു. മെസ്സിയെ മറ്റുള്ളവരിൽ നിന്ന് വ്യത്യസ്തനാക്കുന്നതും,  ലോകം അദ്ദേഹത്തെ ഇത്രയധികം സ്നേഹിക്കുന്നതും ഈ വിനയം കൊണ്ടുതന്നെയാണ്.