എൻസോ ചെൽസിയിൽ അസംതൃപ്തൻ, സ്വന്തമാക്കാൻ ബാഴ്സയും ഇന്ററും!

അർജന്റൈൻ സൂപ്പർതാരമായ എൻസോ ഫെർണാണ്ടസിനെ ഒരു വലിയ തുക നൽകി കൊണ്ടായിരുന്നു ചെൽസി സ്വന്തമാക്കിയിരുന്നത്. എന്നാൽ താരം ക്ലബ്ബിൽ എത്തുന്ന സമയത്ത് വലിയ പ്രതിസന്ധിയിലൂടെയായിരുന്നു അവർ കടന്നു പോയിരുന്നത്.ഇപ്പോൾ എൻസോക്ക് ഒരല്പം ബുദ്ധിമുട്ടേറിയ സമയമാണ്.എന്തെന്നാൽ ചെൽസിയിൽ വേണ്ടത്ര അവസരങ്ങൾ അദ്ദേഹത്തിന് ലഭിക്കുന്നില്ല.

ചെൽസിയുടെ പരിശീലകനായ എൻസോ മര സ്ക്ക ഈ അർജന്റൈൻ താരത്തിന് ഇപ്പോൾ അവസരങ്ങൾ നൽകുന്നില്ല.പ്രത്യേകിച്ച് സ്റ്റാർട്ടിങ് ഇലവനിൽ അദ്ദേഹത്തിന് ഇടം ലഭിക്കാറില്ല.ലഭിച്ച വിലയുടെ അടിസ്ഥാനത്തിലല്ല, പ്രകടനത്തിന്റെ അടിസ്ഥാനത്തിലാണ് ടീമിനെ തിരഞ്ഞെടുക്കുക എന്ന് കഴിഞ്ഞ ദിവസം ഇദ്ദേഹം വ്യക്തമാക്കുകയും ചെയ്തിരുന്നു. ഇതുകൊണ്ടൊക്കെ തന്നെയും എൻസോ ക്ലബ്ബിനകത്ത് അസംതൃപ്തനാണ്.

അതുകൊണ്ടുതന്നെ അദ്ദേഹം ചെൽസിയോട് വിട പറയാൻ സാധ്യതയുണ്ട്.ഈ അവസരം മുതലെടുക്കാൻ രണ്ട് ക്ലബ്ബുകൾ രംഗത്ത് വന്നിട്ടുണ്ട്.ഒന്ന് ബാഴ്സലോണയാണ്, മറ്റൊരു ക്ലബ്ബ് ഇന്റർ മിലാനാണ്.ഈ രണ്ട് ക്ലബ്ബുകൾക്കും താരത്തിൽ താല്പര്യമുണ്ട്. പ്രമുഖ ഇംഗ്ലീഷ് മാധ്യമമായ ദി സൺ ആണ് ഇക്കാര്യം റിപ്പോർട്ട് ചെയ്തിട്ടുള്ളത്.

പക്ഷേ താരത്തെ സ്വന്തമാക്കണമെങ്കിൽ വലിയ ഒരു തുക തന്നെ മുടക്കേണ്ടി വന്നേക്കും.എൻസോയിൽ റയൽ മാഡ്രിഡിന് താല്പര്യമുണ്ട് എന്ന റൂമറുകൾ നേരത്തെ പുറത്തുവന്നിരുന്നുവെങ്കിലും അതിലൊന്നും പുരോഗതി രേഖപ്പെടുത്തിയിരുന്നില്ല. ഏതായാലും അർഹിക്കുന്ന രൂപത്തിലുള്ള അവസരങ്ങൾ ലഭിച്ചിട്ടില്ലെങ്കിൽ എൻസോ ചെൽസി വിടാൻ തന്നെയാണ് സാധ്യത. ലോകത്തെ ഏറ്റവും എക്സ്പെൻസീവ് ആയ മിഡ്‌ഫീൽഡർ എന്ന റെക്കോർഡ് കൈവശമുള്ള താരം കൂടിയാണ് എൻസോ.അദ്ദേഹത്തിന് വേണ്ടി ചെൽസി 107 മില്യൺ പൗണ്ട് ആയിരുന്നു ചിലവഴിച്ചിരുന്നത്.