MLS ടീം ഓഫ് ദി വീക്ക്, മെസ്സിയുൾപ്പെടെ മൂന്ന് മയാമി താരങ്ങൾ ഇടം നേടി.

തകർപ്പൻ പ്രകടനമാണ് ലയണൽ മെസ്സി ഇന്റർ മയാമിക്ക് വേണ്ടി നടത്തുന്നത്. ക്ലബ്ബിന് ലീഗ്സ് കപ്പ് കിരീടം നേടി കൊടുക്കാൻ മെസ്സിക്ക് കഴിഞ്ഞിരുന്നു. മാത്രമല്ല മെസ്സി കളിച്ച ഒരൊറ്റ മത്സരത്തിൽ പോലും ഇന്റർ മയാമി പരാജയപ്പെട്ടിട്ടില്ല.MLS ലും വിലപ്പെട്ട പോയിന്റുകൾ കരസ്ഥമാക്കാൻ ഇന്റർ മയാമിക്ക് സാധിച്ചിരുന്നു.

എംഎൽഎസിൽ മാത്രമായി മെസ്സി മൂന്ന് മത്സരങ്ങളാണ് കളിച്ചിട്ടുള്ളത്.ഒരു ഗോളും രണ്ട് അസിസ്റ്റുകളും മെസ്സി നേടിയിട്ടുണ്ട്.ഇപ്പോഴിതാ MLS ലെ ടീം ഓഫ് ദി വീക്ക് പ്രസിദ്ധീകരിച്ചിട്ടുണ്ട്.ലയണൽ മെസ്സി ഇടം കണ്ടെത്തിക്കഴിഞ്ഞു. മെസ്സിയെ കൂടാതെ 2 ഇന്റർ മയാമി താരങ്ങളും ഈ ഇലവനിൽ സ്ഥാനം ഉറപ്പിച്ചിട്ടുണ്ട്.

സൂപ്പർ താരം ജോർഡി ആൽബ, ഗോൾകീപ്പർ ഡ്രെയ്ക്ക് കല്ലണ്ടർ എന്നിവരാണ് ഈ ഇലവനിൽ ഇടം നേടിയിട്ടുള്ളത്.ഫിലാഡൽഫിയയുടെ കായ് വാഗ്നർ,റിയൽ സാൾട്ട് ലേക്കിന്റെ ബ്രയാൻ വേര,ഒർലാന്റോ സിറ്റിയുടെ ഫകുണ്ടോ ടോറസ്,പോർട്ട്ലാന്റിന്റെ ഇവാണ്ടർ, ന്യൂ ഇംഗ്ലണ്ടിന്റെ തോമസ്, സ്പോർട്ടിംഗിന്റെ അലൻ പുളിഡോ,ഡിസി യുണൈറ്റഡിന്റെ ക്രിസ്ത്യൻ ബെൻടെക്കെ, കൊളംബസിന്റെ കൂചോ ഹെർണാണ്ടസ് എന്നിവരാണ് ഈ ഇലവനിൽ ഇടം നേടിയിട്ടുള്ള മറ്റു താരങ്ങൾ.

ഏതായാലും അമേരിക്കയിൽ എത്തിയതിനുശേഷം മെസ്സി മാസ്മരിക പ്രകടനം ആണ് നടത്തുന്നത്. ആകെ കളിച്ച 11 മത്സരങ്ങളിൽ നിന്ന് 11 ഗോളുകളും 5 അസിസ്റ്റുകളും ലയണൽ മെസ്സി നേടിക്കഴിഞ്ഞിട്ടുണ്ട്. നിലവിൽ വേൾഡ് കപ്പ് യോഗ്യത മത്സരങ്ങൾക്ക് വേണ്ടി അർജന്റീന ദേശീയ ടീമിനോടൊപ്പമാണ് മെസ്സിയുള്ളത്.