മാജിക്കൽ മെസ്സി,സൂപ്പർ ആൽവരസ്, ക്രൊയേഷ്യയെ തരിപ്പണമാക്കി അർജന്റീന കലാശപ്പോരിന്!

ഖത്തർ വേൾഡ് കപ്പിന്റെ ആദ്യ സെമി ഫൈനൽ മത്സരത്തിൽ ലാറ്റിനമേരിക്കൻ വമ്പന്മാരായ അർജന്റീനക്ക് തകർപ്പൻ വിജയം. എതിരില്ലാത്ത മൂന്ന് ഗോളുകൾക്കാണ് അർജന്റീന ക്രൊയേഷ്യയെ പരാജയപ്പെടുത്തിയത്.സൂപ്പർ താരങ്ങളായ ലയണൽ മെസ്സി,ഹൂലിയൻ ആൽവരസ് എന്നിവരുടെ മികവിലാണ് അർജന്റീന ഈയൊരു വിജയം നേടിയിട്ടുള്ളത്. ഇതോടുകൂടി അർജന്റീന ഫൈനലിൽ പ്രവേശിക്കുകയും ചെയ്തു.

ഒരു ഗോളും ഒരു അസിസ്റ്റുമാണ് ലയണൽ മെസ്സി ഈ മത്സരത്തിൽ നേടിയിട്ടുള്ളത്. അതേസമയം ഹൂലിയൻ ആൽവരസ് രണ്ട് ഗോളുകൾ കരസ്ഥമാക്കുകയും ചെയ്തു. മത്സരത്തിന്റെ 34ആം മിനിട്ടിലാണ് അർജന്റീന ആദ്യ ഗോൾ നേടിയത്.ആൽവരസിനെ ഫൗൾ ചെയ്തു വീഴ്ത്തിയതിനെ തുടർന്ന് ലഭിച്ച പെനാൽറ്റി മെസ്സി ലക്ഷ്യത്തിൽ എത്തിക്കുകയായിരുന്നു.

പിന്നീട് 39ആം മിനിട്ടിൽ ആൽവരസിന്റെ അത്ഭുത ഗോൾ പിറന്നു. മെസ്സിയുടെ പാസ് സ്വീകരിച്ച താരം ഒരു സോളോ റണ്ണിലൂടെ ഗോൾ കണ്ടെത്തുകയായിരുന്നു. ക്രൊയേഷ്യൻ ഡിഫൻഡർമാരെ കബളിപ്പിച്ചാണ് ഈ ഒരു ഗോൾ പിറന്നത്. പിന്നീട് 69ആം മിനുട്ടിലാണ് ആൽവരസിന്റെ രണ്ടാം ഗോൾ പിറക്കുന്നത്. ലയണൽ മെസ്സിയുടെ സുന്ദരമായ മുന്നേറ്റത്തിനൊടുവിൽ ഫിനിഷ് ചെയ്യേണ്ട ഉത്തരവാദിത്വം മാത്രമേ ആൽവരസിന് ഉണ്ടായിരുന്നുള്ളൂ.ഗ്വാർഡിയോളിനെ വട്ടം കറക്കിയ മുന്നേറ്റമാണ് മെസ്സി നടത്തിയിട്ടുള്ളത്.

ഏതായാലും മൂന്ന് ഗോളിന്റെ വ്യക്തമായ ആധിപത്യത്തോടുകൂടിയാണ് അർജന്റീന ഫൈനലിൽ പ്രവേശിച്ചിരിക്കുന്നത്. നാളെ നടക്കുന്ന ഫ്രാൻസ്- മൊറോക്കോ സെമിഫൈനലിലെ വിജയികളെ ആയിരിക്കും അർജന്റീന ഫൈനലിൽ നേരിടുക.