മെസ്സിക്ക് പിഴച്ചപ്പോഴും മിന്നും പ്രകടനവുമായി അർജന്റീന,ചാമ്പ്യൻമാരായി കൊണ്ട് പ്രീ ക്വാർട്ടറിൽ!

ഖത്തർ വേൾഡ് കപ്പിൽ നടന്ന തങ്ങളുടെ ഗ്രൂപ്പ് ഘട്ടത്തിലെ അവസാനം മത്സരത്തിൽ അർജന്റീനക്ക് മിന്നുന്ന വിജയം.എതിരില്ലാത്ത രണ്ടു ഗോളുകൾക്കാണ് അർജന്റീന പോളണ്ടിനെ പരാജയപ്പെടുത്തിയത്. ഈ വിജയത്തോടെ അർജന്റീന ഗ്രൂപ്പ് ചാമ്പ്യന്മാരായിക്കൊണ്ട് പ്രീ ക്വാർട്ടറിൽ പ്രവേശിച്ചിട്ടുണ്ട്. അതേസമയം പരാജയപ്പെട്ടുവെങ്കിലും മെക്സിക്കോയും മറികടന്നു കൊണ്ട് പോളണ്ടും പ്രീ ക്വാർട്ടറിൽ പ്രവേശിച്ചിട്ടുണ്ട്.

ഹൂലിയൻ ആൽവരസ്,എൻസോ എന്നിവരെ ഉൾപ്പെടുത്തി കൊണ്ടാണ് ആദ്യ ഇലവൻ പുറത്തുവിട്ടിരുന്നത്. തുടക്കം മുതലേ മികച്ച പ്രകടനമാണ് അർജന്റീന പുറത്തെടുത്തത്.മത്സരത്തിൽ അർജന്റീനക്ക് അനുകൂലമായ ഒരു പെനാൽറ്റി ആദ്യപകുതി ലഭിച്ചിരുന്നു. എന്നാൽ ലയണൽ മെസ്സിയുടെ പെനാൽറ്റി ഷെസ്‌നി സേവ് ചെയ്യുകയായിരുന്നു.ഷെസ്‌നിയുടെ മിന്നും പ്രകടനമാണ് ആദ്യപകുതിയിൽ അർജന്റീനക്ക് ഗോൾ നിഷേധിച്ചത്.

എന്നാൽ രണ്ടാം പകുതിയുടെ തുടക്കത്തിൽ തന്നെ അർജന്റീനയുടെ ഗോൾ വന്നു.മൊളീനയുടെ ക്രോസിൽ നിന്ന് മാക്ക് ആല്ലിസ്റ്ററാണ് ഗോൾ കണ്ടെത്തിയത്. പിന്നീട് 67ആം മിനുട്ടിൽ ഹൂലിയൻ ആൽവരസിന്റെ ഗോൾ പിറന്നു. എൻസോ ഫെർണാണ്ടസിന്റെ പാസ് സ്വീകരിച്ച ആൽവരസ് മികച്ച ഷോട്ടിലൂടെ പന്ത് വലയിൽ എത്തിക്കുകയായിരുന്നു.

ഏതായാലും പ്രീ ക്വാർട്ടറിൽ അർജന്റീനക്ക് എതിരാളികളായി ലഭിച്ചിരിക്കുന്നത് ഓസ്ട്രേലിയയെയാണ്. അർജന്റീനയെ സംബന്ധിച്ചിടത്തോളം കാര്യങ്ങൾ അത്ര പ്രശ്നമല്ല.അതേസമയം പോളണ്ടും ഫ്രാൻസും തമ്മിലാണ് ഏറ്റുമുട്ടുക.