ലോകത്തിലെ മികച്ച താരമുണ്ട്, വേൾഡ് കപ്പ് നേടാനാവുമെന്ന് പ്രതീക്ഷ : അർജന്റീനയെ കുറിച്ച് ഡിയസ്!

വരുന്ന ഖത്തർ വേൾഡ് കപ്പിലേക്കുള്ള ദൂരം ദൈനംദിനം കുറഞ്ഞുകൊണ്ടിരിക്കുകയാണ്. നവംബർ ഇരുപതാം തീയതിയാണ് ഈ വർഷത്തെ വേൾഡ് കപ്പിന് തുടക്കമാവുക. ഇതിനു മുന്നോടിയായി അടുത്ത മാസം എല്ലാ ടീമുകളും സൗഹൃദ മത്സരങ്ങൾ കളിച്ചേക്കും.

ഇത്തവണത്തെ കിരീടം ഫേവറേറ്റുകളിൽ ഒന്നായ അർജന്റീനയെ കുറിച്ച് മുൻ താരവും നിലവിൽ അൽ ഹിലാൽ പരിശീലകനുമായ റാമോൺ ഡിയസ് തന്റെ പ്രതീക്ഷകൾ പങ്കുവെച്ചിട്ടുണ്ട്. ലോകത്തിലെ ഏറ്റവും മികച്ച താരമായ ലയണൽ മെസ്സി കൂടെയുണ്ടെന്നും ഇത്തവണത്തെ വേൾഡ് കപ്പ് കിരീടം നേടാൻ കഴിയുമെന്നുള്ള കാര്യത്തിൽ വളരെയധികം പ്രതീക്ഷയുണ്ട് എന്നുമാണ് ഡിയസ് പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ TYC റിപ്പോർട്ട് ചെയ്യുന്നത് ഇങ്ങനെയാണ്.

” അർജന്റീന നിലവിൽ മികച്ച ഫോമിലാണ്.ലോകത്തിലെ ഏറ്റവും മികച്ചതാരമായ മെസ്സി ഞങ്ങളോടൊപ്പമുണ്ട്. അദ്ദേഹത്തിന്റെ ഏറ്റവും പക്വതയുള്ള വേർഷനാണ് ഇത്. കൂടാതെ ഒരുപാട് പ്രതിഭാധനരായ കളിക്കാരും അർജന്റീനക്കുണ്ട്. ഈ വേൾഡ് കപ്പിന്റെ ഫൈനലിൽ എത്താൻ സാധിക്കുമെന്നും അതുവഴി കിരീടം നേടാൻ സാധിക്കുമെന്നുമുള്ള കാര്യത്തിൽ ഞങ്ങൾ അർജന്റീനക്കാർ ശുഭപ്രതീക്ഷയിലാണ്.സ്‌കലോണി വളരെ നല്ല രൂപത്തിലാണ് ടീമിനെ മുന്നോട്ടു കൊണ്ടുപോകുന്നത്. അദ്ദേഹത്തിന് എന്റെ ഉപദേശം ആവശ്യമുണ്ടെന്നു തോന്നുന്നില്ല ” ഇതാണ് ഡയസ് പറഞ്ഞിട്ടുള്ളത്.

സൗദി അറേബ്യൻ ക്ലബ്ബായ അൽ ഹിലാലിൽ സൗദിയുടെ ദേശീയ ടീമിൽ കളിക്കുന്ന ഒരുപാട് താരങ്ങളുണ്ട്. അർജന്റീനയുടെ ഗ്രൂപ്പിലാണ് സൗദി ഉൾപ്പെട്ടിരിക്കുന്നത്.ഡയസ് പരിശീലിപ്പിക്കുന്ന താരങ്ങളെയാണ് അർജന്റീനക്ക് വേൾഡ് കപ്പിൽ നേരിടേണ്ടി വരിക.