വെറാറ്റി ഇനിയേസ്റ്റ,സാവി എന്നിവരെ പോലെ : നെയ്മർ ജൂനിയർ

ഇന്നലെ യുവേഫ ചാമ്പ്യൻസ് ലീഗിൽ നടന്ന ആദ്യപാദ പ്രീക്വാർട്ടറിൽ മത്സരത്തിൽ എതിരില്ലാത്ത ഒരു ഗോളിനായിരുന്നു പിഎസ്ജി റയലിനെ പരാജയപ്പെടുത്തിയത്. മത്സരത്തിന്റെ അവസാനത്തിൽ കിലിയൻ എംബപ്പേ നേടിയ ഗോളാണ് പിഎസ്ജിക്ക് ജയം സമ്മാനിച്ചത്.

തകർപ്പൻ പ്രകടനമായിരുന്നു പിഎസ്ജിക്ക് വേണ്ടി ഇറ്റാലിയൻ മധ്യനിര താരമായ മാർക്കോ വെറാറ്റി പുറത്തെടുത്തത്. മത്സരത്തിന്റെ മുഴുവൻ സമയവും കളിച്ച താരം തന്റെ 92 ശതമാനം പാസുകളും വിജയകരമായി പൂർത്തിയാക്കിയിരുന്നു. കൂടാതെ മൂന്ന് ടാക്കിളുകളും താരം നടത്തി.

ഏതായാലും വെറാറ്റിയെ പ്രശംസിച്ചുകൊണ്ട് സഹതാരമായ നെയ്മർ ജൂനിയർ ഇപ്പോൾ രംഗത്ത് വന്നിട്ടുണ്ട്. അതായത് ബാഴ്സ ഇതിഹാസങ്ങളായ സാവി,ഇനിയേസ്റ്റ എന്നിവരെ പോലെയുള്ള ഒരു ജീനിയസാണ് വെറാറ്റി എന്നാണ് നെയ്മർ പറഞ്ഞിരിക്കുന്നത്. അദ്ദേഹത്തിന്റെ വാക്കുകൾ ഇങ്ങനെയാണ്.

” വെറാറ്റി ഒരു മികച്ച താരമാണ് എന്നുള്ള കാര്യം എനിക്കറിയാം.പക്ഷെ അദ്ദേഹം ഇത്രത്തോളം ഗംഭീരമായ ഒരു താരമാണ് എന്നുള്ളത് ഞാൻ മനസ്സിലാക്കിയിരുന്നില്ല. അദ്ദേഹമൊരു ജീനിയസാണ്. എന്നോടൊപ്പം കളിച്ചിട്ടുള്ള ഏറ്റവും മികച്ച മധ്യനിര താരങ്ങളിലൊരാളാണ് വെറാറ്റി.സാവി,ഇനിയേസ്റ്റ എന്നിവർക്കൊപ്പമാണ് അദ്ദേഹത്തിന്റെ സ്ഥാനം ” ഇതാണ് നെയ്മർ പറഞ്ഞത്.

ഒരിടവേളക്ക് ശേഷം നെയ്മർ ജൂനിയർ ഇന്നലെ വീണ്ടും പിഎസ്ജിക്ക് വേണ്ടി കളത്തിലേക്കിറങ്ങിയിരുന്നു.വിജയഗോളിന് അസിസ്റ്റ് നൽകിയതും നെയ്മർ തന്നെയാണ്.