ജനുവരിയിൽ റയലിലേക്കെത്തുമോ? തുറന്ന് പറഞ്ഞ് എംബപ്പേ!

ഈ സീസണോട് കൂടി കരാർ അവസാനിക്കുന്ന പ്രധാനപ്പെട്ട താരങ്ങളിൽ ഒരാളാണ് സൂപ്പർ താരമായ കിലിയൻ എംബപ്പേ. മുമ്പ് തന്നെ പിഎസ്ജി വിടാനുള്ള ആഗ്രഹം എംബപ്പേ തുറന്ന് പ്രകടിപ്പിച്ചിരിന്നു. മാത്രമല്ല കഴിഞ്ഞ ട്രാൻസ്ഫറിൽ റയൽ താരത്തിന് വേണ്ടി നന്നായി പരിശ്രമിച്ചിരുന്നുവെങ്കിലും ഫലം കണ്ടിരുന്നില്ല.

ഏതായാലും ഈ ജനുവരി ട്രാൻസ്ഫർ ജാലകത്തിൽ റയലിലേക്ക് എത്താൻ സാധ്യതയുണ്ടോ എന്ന ചോദ്യത്തിനിപ്പോൾ എംബപ്പേ മറുപടി പറഞ്ഞിട്ടുണ്ട്. ഈ സീസണിൽ പിഎസ്ജിയിൽ തന്നെ തുടരുമെന്നും പിഎസ്ജിയോടൊപ്പം ചാമ്പ്യൻസ് ലീഗ് കിരീടം നേടണമെന്നുമാണ് ഇപ്പോൾ എംബപ്പേ പറഞ്ഞിട്ടുള്ളത്. കഴിഞ്ഞ ദിവസം CNN നോട്‌ സംസാരിക്കുകയായിരുന്നു അദ്ദേഹം. എംബപ്പേയുടെ വാക്കുകൾ ഇങ്ങനെയാണ്.

” ചാമ്പ്യൻസ് ലീഗ് കിരീടവും ലീഗ് കിരീടവുമൊക്കെ നേടാൻ വേണ്ടി ഞാനെന്റെ സർവ്വതും പിഎസ്ജിക്ക് വേണ്ടി സമർപ്പിക്കും.കൂടാതെ ആരാധകർക്ക് ഞാൻ സന്തോഷം നൽകാനും ശ്രമിക്കും, കാരണം അവരത് അർഹിക്കുന്നുണ്ട്.മുമ്പ് പിഎസ്ജി വിടാൻ ആഗ്രഹിക്കുന്നു എന്ന് പറഞ്ഞത് സത്യസന്ധമായി തന്നെയാണ്.പക്ഷേ ഇപ്പോൾ ഇവിടെ തുടരുന്നതിൽ ഞാൻ ഹാപ്പിയാണ്.ഇതെന്റെ നഗരമാണ്, ഞാനൊരു ഫ്രഞ്ചുകാരനാണ്.ഈ സീസണിലെ എല്ലാം നേടാനാണ് ഞാൻ ആഗ്രഹിക്കുന്നത്.പാരീസിലാണ് ഞാൻ ജനിച്ചതും വളർന്നതും പിഎസ്ജിയിൽ കളിക്കുമ്പോൾ,കുടുംബത്തിനും സുഹൃത്തുക്കൾക്കുമൊപ്പം കളിക്കുന്ന ഒരനുഭവമാണ് ” എംബപ്പേ പറഞ്ഞു.

ഈ സീസണോട് കൂടി എംബപ്പേ ഫ്രീ ഏജന്റാവും. താരം ഇതുവരെ ഭാവിയെ കുറിച്ച് തീരുമാനങ്ങൾ കൈകൊണ്ടിട്ടില്ല. ഈ ജനുവരി മുതൽ മറ്റേത് ക്ലബുമായും പ്രീ കോൺട്രാക്ടിൽ ഏർപ്പെടാനുള്ള അവസരവും എംബപ്പേക്കുണ്ട്.