എതിരാളികൾ പോലും മെസ്സിയെ ആസ്വദിക്കുന്നു : സ്കലോണി!

ഇന്ന് കോപ്പ അമേരിക്കയിൽ നടന്ന ക്വാർട്ടർ ഫൈനൽ പോരാട്ടത്തിൽ ഇക്വഡോറിനെ എതിരില്ലാത്ത മൂന്ന് ഗോളുകൾക്ക് പരാജയപ്പെടുത്തി കൊണ്ട് അർജന്റീന സെമിയിൽ പ്രവേശിച്ചിരുന്നു. ഈ മൂന്ന് ഗോളിലും മെസ്സിയുടെ മാന്ത്രികസ്പർശമുണ്ടായിരുന്നു. ഈ കോപ്പ അമേരിക്ക ഏറ്റവും വലിയ ഗോൾവേട്ടക്കാരനും ഏറ്റവും കൂടുതൽ അസിസ്റ്റ് നൽകിയ താരവും ലയണൽ മെസ്സി തന്നെയാണ്. ഏതായാലും മത്സരശേഷം തങ്ങളുടെ നായകനെ വാനോളം പുകഴ്ത്തിയിരിക്കുകയാണ് പരിശീലകനായ ലയണൽ സ്കലോണി. ലോകത്തിലെ എക്കാലത്തെയും മികച്ച താരമാണ് ലയണൽ മെസ്സിയെന്നും എതിരാളികൾ പോലും അദ്ദേഹത്തെ ആസ്വദിക്കുന്നുണ്ട് എന്നാണ് സ്കലോണി പറഞ്ഞിട്ടുള്ളത്. ടിവൈസി സ്പോർട്സ് ആണ് സ്കലോണിയുടെ വാക്കുകൾ റിപ്പോർട്ട്‌ ചെയ്തിരിക്കുന്നത്.

” എക്കാലത്തെയും മികച്ച താരമാണ് മെസ്സി. അദ്ദേഹത്തെ പോലെയൊരു താരത്തെ കണ്ടെത്തുക ബുദ്ധിമുട്ട് ആണ്. നെയ്മർക്ക് ചെറിയ സാമ്യതകൾ ഉണ്ട്.അദ്ദേഹത്തിന് കഴിയുന്ന കാലം അദ്ദേഹം കളിക്കുക എന്നുള്ളതാണ് ഫുട്ബോൾ ആരാധകർക്ക് ലഭിക്കാവുന്ന ഏറ്റവും കാര്യം. എന്തെന്നാൽ അത്രയും കാലം നമുക്ക് അദ്ദേഹത്തെ ആസ്വദിക്കാൻ കഴിയും. മാത്രമല്ല എതിരാളികൾ പോലും മെസ്സിയെ ആസ്വദിക്കുന്നുണ്ട്.മത്സരം എളുപ്പത്തിൽ വിജയിക്കാമെന്ന് ആരെങ്കിലും കരുതുന്നുണ്ടെങ്കിൽ അത്‌ തെറ്റാണ്.പ്രത്യേകിച്ച് ഈ കോപ്പ അമേരിക്ക.പലപ്പോഴും മത്സരങ്ങൾ ബുദ്ധിമുട്ടേറിയതാണ് ” സ്കലോണി പറഞ്ഞു.