വീണ്ടും ജയം,ചാമ്പ്യൻസ് ലീഗിൽ ക്ലോപും സംഘവും മുന്നോട്ട്!

പ്രീമിയർ ലീഗിൽ മോശം ഫോം തുടരുമ്പോഴും ചാമ്പ്യൻസ് ലീഗിൽ ജയം തുടർന്ന് ലിവർപൂൾ. ഇന്നലെ ചാമ്പ്യൻസ് ലീഗിൽ നടന്ന പ്രീ ക്വാർട്ടർ പോരാട്ടത്തിലെ രണ്ടാം പാദമത്സരത്തിലും ലിവർപൂൾ വിജയം നേടിയെടുക്കുകയായിരുന്നു. എതിരില്ലാത്ത രണ്ടു ഗോളുകൾക്കാണ് ലിവർപൂൾ ഒരിക്കൽ കൂടി ആർബി ലീപ്സിഗിനെ തകർത്തു വിട്ടത്. ആദ്യപാദത്തിലും രണ്ട് ഗോളുകൾക്ക് ലിവർപൂൾ വിജയിച്ചിരുന്നു. ഇതോടെ 4-0 എന്ന ആധികാരിക ജയം നേടികൊണ്ടാണ് ലിവർപൂൾ ക്വാർട്ടർ ഫൈനലിലേക്ക് ടിക്കറ്റെടുത്തത്.ഹങ്കറിയിലെ ബുഡാപെസ്റ്റിൽ നടന്ന മത്സരത്തിൽ ലിവർപൂളിന് വേണ്ടി സലാ,സാഡിയോ മാനെ എന്നിവരാണ് ഗോളുകൾ നേടിയത്.

സലാ, ജോട്ട, മാനെ എന്ന ത്രയത്തെയാണ് ക്ലോപ് മുന്നേറ്റനിരയിൽ നിയോഗിച്ചത്.എന്നാൽ മത്സരത്തിന്റെ എഴുപതാം മിനുട്ട് കാത്തിരിക്കേണ്ടി വന്നു ലിവർപൂളിന് ആദ്യഗോൾ നേടാൻ.ഡിയഗോ ജോട്ടയുടെ അസിസ്റ്റിൽ നിന്നാണ് സലാ ഗോൾ കണ്ടെത്തിയത്.തുടർന്ന് 74-ആം മിനുട്ടിൽ മാനെയുടെ ഗോൾ കൂടി വന്നു.ഒറിഗിയുടെ അസിസ്റ്റിൽ നിന്നാണ് മാനെ ഗോൾ നേടിയത്.ഈ രണ്ട് ഗോളുകൾക്ക് ലിവർപൂൾ വിജയം പിടിച്ചെടുക്കുകയായിരുന്നു. പ്രീമിയർ ലീഗിലെ മോശം പ്രകടനത്തിനിടയിലും ലിവർപൂളിന് ഏറെ ആശ്വാസം നൽകുന്നതാണ് ഈ വിജയം.