ലോകത്തിലെ ഏറ്റവും മികച്ച താരമാണ് മെസ്സി : എംബപ്പേ!

കഴിഞ്ഞ ക്ലബ് ബ്രൂഗെക്കെതിരെയുള്ള മത്സരത്തിൽ തകർപ്പൻ വിജയം നേടാൻ കരുത്തരായ പിഎസ്ജിക്ക് കഴിഞ്ഞിരുന്നു. മത്സരത്തിൽ സൂപ്പർ താരങ്ങളായ ലയണൽ മെസ്സിയും കിലിയൻ എംബപ്പേയും ഇരട്ട ഗോളുകൾ നേടുകയായിരുന്നു. ലയണൽ മെസ്സിയും എംബപ്പേയും തമ്മിൽ മികച്ച ഒത്തിണക്കം കാണിക്കുന്നത് പല സമയത്തും ആരാധകർക്ക് കാണാൻ സാധിച്ചിരുന്നു.

ഏതായാലും ലയണൽ മെസ്സിക്കൊപ്പം കളിക്കുന്നത് എളുപ്പമാണ് എന്നുള്ള അഭിപ്രായം പങ്കുവെച്ചിരിക്കുകയാണിപ്പോൾ സഹ താരമായ കിലിയൻ എംബപ്പേ. കൂടാതെ ലോകത്തിലെ ഏറ്റവും മികച്ച താരമാണ് ലയണൽ മെസ്സിയെന്നും താരം കൂട്ടിച്ചേർത്തു.കഴിഞ്ഞ ദിവസം ബിട്ടി സ്പോർട്ടിനോട് സംസാരിക്കുകയായിരുന്നു അദ്ദേഹം. എംബപ്പേയുടെ വാക്കുകൾ ഇങ്ങനെയാണ്.

” ലയണൽ മെസ്സിക്കൊപ്പം കളിക്കുക എന്നുള്ളത് എളുപ്പമുള്ള കാര്യമാണ്.ലോകത്തിലെ ഏറ്റവും മികച്ച താരമാണ് അദ്ദേഹം.ദിവസങ്ങൾക്ക് മുമ്പാണ് അദ്ദേഹം ബാലൺ ഡി’ഓർ സ്വന്തമാക്കിയത്.ബ്രൂഗെക്കെതിരെ രണ്ട് ഗോളുകൾ അദ്ദേഹം നേടി. മെസ്സി ഹാപ്പിയാണ്.അദ്ദേഹം ഭാവിയിൽ ഞങ്ങൾക്ക് സഹായകരമാവുമെന്ന് ഞാൻ പ്രതീക്ഷിക്കുന്നു ” എംബപ്പേ പറഞ്ഞു.

അതേസമയം പിഎസ്ജി ചാമ്പ്യൻസ് ലീഗ് ഗ്രൂപ്പിൽ രണ്ടാമതായാണ് ഫിനിഷ് ചെയ്തിരിക്കുന്നത്. അത്കൊണ്ട് തന്നെ ശക്തരായ എതിരാളികൾ ആയിരിക്കും പിഎസ്ജിക്ക് പ്രീ ക്വാർട്ടറിൽ. ഇതിനെ കുറിച്ചും എംബപ്പേ പറഞ്ഞിട്ടുണ്ട്. അതിങ്ങനെയാണ്.

” ആരായിരിക്കും എതിരാളികൾ എന്ന് ഞങ്ങൾക്കറിയില്ല.നറുക്കെടുപ്പിന് വേണ്ടി ഞങ്ങൾ കാത്തിരിക്കുകയാണ്.ഏത് രൂപത്തിലുള്ള പ്രകടനമാണ് പുറത്തെടുക്കുക എന്നുള്ളത് കാത്തിരുന്നു കാണാം.ആ മത്സരത്തിൽ പോരാടാനും വിജയിക്കാനും ഞങ്ങൾ തയ്യാറാണ് ” എംബപ്പേ പറഞ്ഞു.

മാഞ്ചസ്റ്റർ സിറ്റിയായിരുന്നു പിഎസ്ജിയെ പിന്തള്ളി കൊണ്ട് ഒന്നാം സ്ഥാനം സ്വന്തമാക്കിയത്. അത്കൊണ്ട് തന്നെ പിഎസ്ജിക്ക് പ്രീ ക്വാർട്ടർ കടുപ്പമാവും.