റയലിന്റെ ചരിത്രത്തോടാണ് ഏറ്റുമുട്ടുന്നതെങ്കിൽ ഒരു സാധ്യതയും ഞങ്ങൾക്കില്ല: പെപ് ഗ്വാർഡിയോള!

ഇന്ന് യുവേഫ ചാമ്പ്യൻസ് ലീഗിൽ നടക്കുന്ന ആദ്യപാദ സെമി ഫൈനൽ പോരാട്ടത്തിൽ മാഞ്ചസ്റ്റർ സിറ്റി കളത്തിലേക്കിറങ്ങുന്നുണ്ട്. സ്പാനിഷ് വമ്പന്മാരായ റയൽ മാഡ്രിഡാണ് സിറ്റിയുടെ എതിരാളികൾ. ഇന്ന് രാത്രി ഇന്ത്യൻ സമയം 12:30-ന് സിറ്റിയുടെ മൈതാനമായ ഇത്തിഹാദിൽ വെച്ചാണ് ഈയൊരു പോരാട്ടം അരങ്ങേറുക.

ഈ മത്സരത്തിനു മുന്നോടിയായി നടന്ന പത്രസമ്മേളനത്തിൽ സിറ്റിയുടെ പരിശീലകനായ പെപ് ഗ്വാർഡിയോള റയലിനെ പ്രശംസിച്ചിട്ടുണ്ട്. അതായത് റയലിന്റെ ചരിത്രമെടുത്ത് നോക്കുകയാണെങ്കിൽ ഈ മത്സരത്തിൽ ഒരു ഒരു സാധ്യതയും തങ്ങൾക്ക് അവശേഷിക്കുന്നില്ല എന്നാണ് പെപ് പറഞ്ഞത്. റയൽ മാഡ്രിഡ് പിഎസ്ജി,ചെൽസി എന്നിവരെ കീഴടക്കിയത് ഭാഗ്യം കൊണ്ടല്ലെന്നും ഇദ്ദേഹം കൂട്ടിച്ചേർത്തിട്ടുണ്ട്.പെപിന്റെ വാക്കുകൾ ഇങ്ങനെയാണ്.

” റയൽ മാഡ്രിഡ് ചെൽസി,പിഎസ്ജി എന്നിവരെ മറികടന്നത് ഭാഗ്യം കൊണ്ടൊന്നുമല്ല.അത് ആളുകൾ പറഞ്ഞുണ്ടാക്കുന്നതാണ്. അവർക്ക് ഒരുപാട് ക്വാളിറ്റി താരങ്ങളുണ്ട്. മൂന്ന് ഗോളുകൾക്ക് പിറകിലാണെങ്കിലും തിരിച്ചുകൊണ്ടുവരാൻ കെല്പുള്ള ഒരു പാട് താരങ്ങൾ അവർക്കുണ്ട്.റയലിന്റെ ചരിത്രത്തോടാണ് ഞങ്ങൾ ഏറ്റുമുട്ടുന്നതെങ്കിൽ ഞങ്ങൾക്ക് ഒരു സാധ്യതയും ഈ മത്സരത്തിൽ അവശേഷിക്കുന്നില്ല. ചരിത്രം അവർക്ക് വേണ്ടി സംസാരിക്കുന്നു. ഞങ്ങളെ സംബന്ധിച്ചിടത്തോളം ഇതൊരു പരീക്ഷണമായിരിക്കും. ഏറ്റവും മികച്ചത് ചെയ്യാൻ ഞങ്ങൾ പരിശ്രമിക്കും. ഒരു പരിശീലകൻ എന്ന നിലയിൽ ഞാൻ ആഗ്രഹിച്ചത് ഇതുവരെ എനിക്ക് ലഭിച്ചിട്ടില്ല. എനിക്ക് കഴിയാവുന്നതിന്റെ പരമാവധി ഞാൻ ചെയ്യും. വളരെ കുറഞ്ഞ സമയം മാത്രമേ ഞങ്ങൾ ബുദ്ധിമുട്ടുകയൊള്ളൂ എന്ന് പ്രതീക്ഷിക്കാം ” ഇതാണ് പെപ് പറഞ്ഞത്.

2020-ലെ ചാമ്പ്യൻസ് ലീഗിൽ ഇരുടീമുകളും തമ്മിൽ മുഖാമുഖം വന്നിരുന്നു. അന്ന് ഇരുപാദങ്ങളിലുമായി രണ്ടിനെതിരെ നാല് ഗോളുകൾക്ക് സിറ്റി റയലിനെ പരാജയപ്പെടുത്തുകയായിരുന്നു.