മെസ്സി ചരിത്രത്തിലെ ഏറ്റവും മികച്ച താരം, അർജന്റീന വേൾഡ് കപ്പ് നേടാനാണ് ഞാൻ ഇഷ്ടപ്പെടുന്നത്: ജാമി കാരഗർ

ഈ സീസണിൽ മികച്ച പ്രകടനമാണ് സൂപ്പർ താരം ലയണൽ മെസ്സി ഇപ്പോൾ പുറത്തെടുക്കുന്നത്. കഴിഞ്ഞ ചാമ്പ്യൻസ് ലീഗ് മത്സരത്തിൽ ബെൻഫിക്കക്കെതിരെയും മെസ്സി ഗോൾ നേടിയിരുന്നു. അവസാനമായി കളിച്ച ആറു മത്സരങ്ങളിൽ നിന്ന് മാത്രം 8 ഗോളുകളാണ് മെസ്സി നേടിയിട്ടുള്ളത്.35ആം വയസിലും തന്റെ പ്രതിഭക്ക് ഒരു കോട്ടവും തട്ടിയിട്ടില്ല എന്നുള്ളത് ദിവസം കൂടുന്തോറും മെസ്സി തെളിയിച്ചു കൊണ്ടിരിക്കുകയാണ്.

ഏതായാലും ലയണൽ മെസ്സിയെ വാനോളം പ്രശംസിച്ചുകൊണ്ട് ഇപ്പോൾ ലിവർപൂൾ ഇതിഹാസമായ ജാമി കാരഗർ രംഗത്ത് വന്നിട്ടുണ്ട്. ഫുട്ബോൾ ചരിത്രത്തിലെ എക്കാലത്തെയും മികച്ച താരമാണ് ലയണൽ മെസ്സി എന്നാണ് കാരഗർ പറഞ്ഞിട്ടുള്ളത്. ഖത്തർ വേൾഡ് കപ്പ് മെസ്സി നേടുന്നതിനെയാണ് താൻ ഇഷ്ടപ്പെടുന്നതെന്നും കാരഗർ കൂട്ടിച്ചേർത്തിട്ടുണ്ട്. കഴിഞ്ഞ സിബിഎസ് സ്പോർട്സിൽ സംസാരിക്കുകയായിരുന്നു അദ്ദേഹം.കാരഗറുടെ വാക്കുകൾ ഇങ്ങനെയാണ്.

” ഫുട്ബോൾ ചരിത്രത്തിൽ കളിച്ചിട്ടുള്ള എക്കാലത്തെയും മികച്ച താരം ലയണൽ മെസ്സിയാണ് എന്നുള്ളത് എനിക്കിപ്പോൾ പറയാൻ സാധിക്കും. ലയണൽ മെസ്സി അർജന്റീനക്കൊപ്പം വരുന്ന ഖത്തർ വേൾഡ് കപ്പ് കിരീടം നേടുന്നതിനേക്കാൾ ഞാൻ ഇഷ്ടപ്പെടുന്ന മറ്റൊന്നുമില്ല ” ഇതാണ് കാരഗർ പറഞ്ഞിട്ടുള്ളത്.

തീർച്ചയായും മെസ്സിയുടെ ഈ മിന്നുന്ന ഫോം വരുന്ന വേൾഡ് കപ്പിൽ അർജന്റീനക്ക് ഗുണം ചെയ്യുമെന്നുള്ള കാര്യത്തിൽ സംശയമില്ല. അവസാനമായി അർജന്റീനക്ക് വേണ്ടി കളിച്ച രണ്ടു മത്സരങ്ങളിൽ നിന്ന് നാല് ഗോളുകൾ നേടാൻ കഴിഞ്ഞിട്ടുണ്ട്.വരുന്ന ഖത്തർ വേൾഡ് കപ്പിലെ കിരീട ഫേവറേറ്റുകൾ ആയി കണക്കാക്കപ്പെടുന്ന അർജന്റീന കഴിഞ്ഞ 35 മത്സരങ്ങളിൽ പരാജയം അറിഞ്ഞിട്ടുമില്ല.