മഗ്വയ്ർ,ഒനാന എന്നിവരുടെ മികവിൽ യുണൈറ്റഡ്, വീണ്ടും ഗോളടിച്ച് ബെല്ലിങ്ഹാം!

ഇന്നലെ യുവേഫ ചാമ്പ്യൻസ് ലീഗിൽ നടന്ന മത്സരത്തിൽ വിജയം നേടാൻ വമ്പൻമാരായ മാഞ്ചസ്റ്റർ യുണൈറ്റഡിന് കഴിഞ്ഞിട്ടുണ്ട്. ഏകപക്ഷീയമായ ഒരു ഗോളിനാണ് കോപ്പൻ ഹേഗനെ അവർ പരാജയപ്പെടുത്തിയിട്ടുള്ളത്. ഡിഫൻഡർ ഹാരി മഗ്വയ്ർ നേടിയ ഗോളാണ് മാഞ്ചസ്റ്റർ യുണൈറ്റഡിന് വിജയം സമ്മാനിച്ചത്. മത്സരത്തിന്റെ 72ആം മിനിറ്റിലാണ് ഹെഡറിലൂടെ മഗ്വയ്ർ വിജയഗോൾ നേടിയത്.

മത്സരത്തിന്റെ ഏറ്റവും അവസാനത്തിൽ കോപ്പൻ ഹേഗന് ഒരു പെനാൽറ്റി ലഭിച്ചിരുന്നു. എന്നാൽ യുണൈറ്റഡ് ഗോൾകീപ്പറായ ഒനാന അത് തടഞ്ഞുകൊണ്ട് രക്ഷപ്പെടുത്തുകയായിരുന്നു. സമീപകാലത്ത് ഏറ്റവും കൂടുതൽ വിമർശനങ്ങൾ കേൾക്കേണ്ടി വന്ന ഒനാനയും മഗ്വയ്റുമാണ് അതിനിർണായകമായ മത്സരത്തിൽ യുണൈറ്റഡിന് വിജയം നേടി കൊടുത്തിട്ടുള്ളത്. ഈ ചാമ്പ്യൻസ് ലീഗിലെ ആദ്യ വിജയമാണ് യുണൈറ്റഡ് ഇപ്പോൾ നേടിയിട്ടുള്ളത്.

അതേസമയം ഇന്നലെ നടന്ന മറ്റൊരു മത്സരത്തിൽ റയൽ മാഡ്രിഡ് വിജയം നേടിയിട്ടുണ്ട്. ഒന്നിനെതിരെ 2 ഗോളുകൾക്കാണ് ബ്രാഗയെ അവർ പരാജയപ്പെടുത്തിയിട്ടുള്ളത്. സൂപ്പർ താരം ജൂഡ് ബെല്ലിങ്ഹാം വീണ്ടും ഗോൾ നേടിയിട്ടുണ്ട്. ശേഷിച്ച ഗോൾ റോഡ്രിഗോയുടെ വകയായിരുന്നു. അസിസ്റ്റ് നേടിയ വിനീഷ്യസും മത്സരത്തിൽ മികച്ച പ്രകടനം നടത്തി.ഇതോടെ മൂന്ന് മത്സരങ്ങളിൽ മൂന്നിലും വിജയിക്കാൻ റയൽ മാഡ്രിഡിന് കഴിഞ്ഞിട്ടുണ്ട്.

മറ്റൊരു മത്സരത്തിൽ ആഴ്സണൽ സെവിയ്യയെ പരാജയപ്പെടുത്തിയിട്ടുണ്ട്.ഒന്നിനെതിരെ രണ്ടു ഗോളുകൾക്കായിരുന്നു വിജയം.ബ്രസീലിയൻ സൂപ്പർതാരങ്ങളായ ജീസസ്,മാർട്ടിനെല്ലി എന്നിവരായിരുന്നു ഗോളുകൾ നേടിയിരുന്നത്. അതേസമയം ഒന്നിനെതിരെ മൂന്നു ഗോളുകൾക്ക് തുർക്കിഷ് ക്ലബ് ആയ ഗലാറ്റസറെയെ പരാജയപ്പെടുത്താൻ ബയേണിന് സാധിച്ചിട്ടുണ്ട്.