ബെൻസിമ ദൈവമാണ്,സ്‌പൈഡർമാനാണ്,അമേരിക്കൻ പ്രസിഡന്റാണ് : പ്രശംസകൾ കൊണ്ട് മൂടി കസിയ്യസ്

ഇന്നലെ യുവേഫ ചാമ്പ്യൻസ് ലീഗിൽ നടന്ന ആദ്യപാദ ക്വാർട്ടർ ഫൈനൽ പോരാട്ടത്തിൽ ചെൽസിയെ പരാജയപ്പെടുത്താൻ റയലിന് സാധിച്ചിരുന്നു. ഒന്നിനെതിരെ മൂന്ന് ഗോളുകൾക്കാണ് റയൽ ചെൽസിയെ അവരുടെ മൈതാനത്ത് തകർത്തു വിട്ടത്. സൂപ്പർ താരം കരിം ബെൻസിമയുടെ ഹാട്രിക്കാണ് റയലിന് ഈ ഉജ്ജ്വല വിജയം സമ്മാനിച്ചത്.

താരത്തിന്റെ ഈ മാസ്മരിക പ്രകടനത്തിന് ഫുട്ബോൾ ലോകത്ത് നിന്നും വലിയ പ്രശംസകളാണ് ലഭിച്ചു കൊണ്ടിരിക്കുന്നത്.ബെൻസിമയുടെ മുൻ സഹതാരവും റയൽ മാഡ്രിഡ് ഇതിഹാസവുമായ കസിയ്യസും താരത്തെ പ്രശംസകൾ കൊണ്ട് മൂടിയിട്ടുണ്ട്.ബെൻസിമയെ വിശേഷിപ്പിക്കാൻ നിരവധി പദപ്രയോഗങ്ങളാണ് കസിയ്യസ് ഉപയോഗിച്ചിട്ടുള്ളത്. തന്റെ ട്വിറ്റർ അക്കൗണ്ടിൽ കസിയ്യസ് മത്സരശേഷം കുറിച്ചത് ഇങ്ങനെയാണ്.

” ബെൻസിമ സ്‌പൈഡർമാനാണ്.ബെൻസിമ വോൾവെറിനാണ്.ഒരു ബിൽഡിങ് ഡോർമാനാണ് അദ്ദേഹം. നിങ്ങളുടെ എല്ലാവരുടെയും ഉറ്റ സുഹൃത്താണ് ബെൻസിമ,നിങ്ങളുടെ ഗ്രാന്റ്മദറാണ് ബെൻസിമ,അമേരിക്കയുടെ പ്രസിഡന്റാണ് ബെൻസിമ,പാരചൂട്ടുമായി ചാടുമ്പോൾ നിങ്ങൾക്ക് നിർദ്ദേശം നൽകുന്ന വ്യക്തിയാണ് ബെൻസിമ,നിങ്ങളുടെ കാവൽമാലാഖയാണ് ബെൻസിമ,ബെൻസിമ ദൈവമാണ് ” ഇതാണ് കസിയ്യസ് കുറിച്ചിട്ടുള്ളത്.

ബെൻസിമയുടെ സഹതാരമായ ലുക്ക മോഡ്രിച്ചും ബെൻസിമയെ പ്രശംസിച്ചിട്ടുണ്ട്.എന്തൊരു താരമാണ് എന്നാണ് ലുക്ക മോഡ്രിച്ച് കുറിച്ചിട്ടുള്ളത്.ഏതായാലും സ്വന്തം മൈതാനത്ത് നടക്കുന്ന രണ്ടാംപാദ മത്സരത്തിലും ബെൻസിമ തന്റെ മാസ്മരിക പ്രകടനം തുടരുമെന്നാണ് ആരാധകർ പ്രതീക്ഷിക്കുന്നത്.