ക്രിസ്റ്റ്യാനോയെയും യുവന്റസിനേയും ട്രോളി ബാഴ്സ, തകർപ്പൻ മറുപടി നൽകി യുവന്റസ് !

ഇന്നലെ ചാമ്പ്യൻസ് ലീഗിൽ നടന്ന മത്സരത്തിൽ എതിരില്ലാത്ത രണ്ട് ഗോളുകൾക്കാണ് എഫ്സി ബാഴ്സലോണ യുവന്റസിനെ പരാജയപ്പെടുത്തിയത്.യുവന്റസിന്റെ മൈതാനത്ത് വെച്ച് നടന്ന മത്സരത്തിൽ ഡെംബലെയുടെയും മെസ്സിയുടെയും ഗോളുകളാണ് ബാഴ്സക്ക് അനായാസജയം സ്വന്തമാക്കാൻ സഹായിച്ചത്. എന്നാൽ മത്സരശേഷം യുവന്റസിനെ ട്രോളിയിരിക്കുകയാണ് എഫ്സി ബാഴ്സലോണ.എന്നാൽ അതിന് തകർപ്പൻ മറുപടി നൽകാനും യുവന്റസ് മറന്നില്ല. ട്വിറ്ററിലാണ് ഇരുടീമുകളും തമ്മിലുള്ള വാക്പോര് നടന്നത്. ” ഗോട്ടിനെ നിങ്ങളുടെ മൈതാനത്ത് നിങ്ങൾക്ക് കാണാൻ സാധിച്ചതിൽ ഞങ്ങൾക്ക് സന്തോഷമുണ്ട് ” എന്നായിരുന്നു എഫ്സി ബാഴ്സലോണ ട്വിറ്ററിൽ കുറിച്ചത്. കൂടെ യുവന്റസിനെ മെൻഷൻ ചെയ്യാനും ബാഴ്സ മറന്നില്ല.

ഗ്രേറ്റസ്റ്റ് ഓഫ് ഓൾ ടൈം എന്നതിന്റെ ചുരുക്കപ്പേരായാണ് ഗോട്ട് എന്ന പദം ഉപയോഗിക്കുന്നത്. മെസ്സിയെ മുൻനിർത്തികൊണ്ട് കൊണ്ട് യുവന്റസിനേയും റൊണാൾഡോയെയും ട്രോളുകയായിരുന്നു ബാഴ്‌സ ചെയ്തത്. എന്നാൽ ഉടൻ തന്നെ യുവന്റസിന്റെ മറുപടിയുമെത്തി. ” നിങ്ങൾ മിക്കവാറും തെറ്റായ ഡിക്ഷണറി ആയിരിക്കാം നോക്കിയിരുന്നത്, യഥാർത്ഥത്തിലുള്ളതിനെ ഞങ്ങൾ ക്യാമ്പ് നൗവിലേക്ക് കൊണ്ട് വരാം ” എന്നാണ് യുവന്റസ് കമന്റ് രൂപേണ ഇതിന് മറുപടി നൽകിയിരുന്നത്. ശരിക്കുമുള്ള ഗോട്ട് ആയ ക്രിസ്റ്റ്യാനോയെ ബാഴ്‌സയുടെ മൈതാനമായ ക്യാമ്പ് നൗവിലേക്ക് കൊണ്ടുവരുമെന്നാണ് യുവന്റസിന്റെ വാദം. ഏതായാലും ഗോട്ട് ആരെന്നുള്ള തർക്കം ആരാധകർക്ക് പുറമെ ക്ലബുകൾ കൂടി ഏറ്റെടുത്തതോടെ ആരാധകർ ആവേശത്തിലാണ്.