ആ ഗോൾ വഴങ്ങാൻ കാരണം ക്രിസ്റ്റ്യാനോ? വിമർശനവുമായി കാപ്പെല്ലോ!

ഇന്നലെ നടന്ന ചാമ്പ്യൻസ് ലീഗ് മത്സരത്തിൽ യുവന്റസ് വിജയിച്ചുവെങ്കിലും ക്വാർട്ടർ കാണാതെ പുറത്തായിരുന്നു. രണ്ട് ഗോളുകൾ സ്വന്തം മൈതാനത്ത് വഴങ്ങിയതാണ് യുവന്റസിന് തിരിച്ചടിയായത്. ഈ രണ്ട് എവേ ഗോളിന്റെ ആനുകൂല്യം മുതലെടുത്ത പോർട്ടോ ക്വാർട്ടറിൽ പ്രവേശിക്കുകയായിരുന്നു. മത്സരത്തിന്റെ ഗതി മാറ്റിയത് 115-ആം മിനുട്ടിൽ ഒലിവേര നേടിയ ആ ഫ്രീകിക്ക് ഗോളായിരുന്നു. യുവന്റസിന്റെ വാളിന്റെ താഴ്ഭാഗത്തിലൂടെയായിരുന്നു ആ ഫ്രീകിക്ക് കടന്നു പോയത്. തുടർന്ന് അത്‌ വലയിൽ പതിക്കുകയും ചെയ്തു. സൂപ്പർ താരം ക്രിസ്റ്റ്യാനോ റൊണാൾഡോയുടെ അശ്രദ്ധ മൂലമാണ് ആ ഗോൾ പിറന്നതെന്ന വിമർശനം അതിന് ശേഷം ഉയർന്നു വന്നിരുന്നു. വാളിൽ ഉണ്ടായിരുന്ന റൊണാൾഡോ പുറം തിരിഞ്ഞു നിന്നു കൊണ്ട് ചാടുകയാണ് ചെയ്തത്. ഇത് ഗോൾ വഴങ്ങാനുള്ള കാരണമായെന്ന് പലരും ആരോപിച്ചിരുന്നു.

ഈ വിഷയത്തിൽ തന്റെ പ്രതികരണമറിയിച്ചിരിക്കുകയാണ് മുൻ താരമായ ഫാബിയോ കാപ്പെല്ലോ. ഭയമുള്ളവരെയൊക്കെ എന്തിനാണ് വാളിൽ നിർത്തുന്നത് എന്നാണ് കാപ്പെല്ലോ ക്രിസ്റ്റ്യാനോയെ ലക്ഷ്യമിട്ട് കൊണ്ട് ചോദിച്ചത്.ഒരു മാപ്പർഹിക്കാത്ത തെറ്റാണ് അവർ അവിടെ വരുത്തിവെച്ചതെന്നും ഇദ്ദേഹം അറിയിച്ചു. ” ഒരിക്കലും മാപ്പർഹിക്കാത്ത പിഴവാണ് അവിടെ വരുത്തിവെച്ചത്.ബോളിനെ ഭയപ്പെടാത്തവരെയാണ് വാളിൽ നിർത്തേണ്ടത്. ഞങ്ങളുടെ കാലത്തൊക്കെ അങ്ങനെയായിരുന്നു ചെയ്തിരുന്നത്.ഇവർ ബോളിനെ ഭയപ്പെടുകയും അതിൽ നിന്ന് ഒഴിഞ്ഞു മാറുകയുമാണ് ചെയ്തത്.അതൊരിക്കലും തന്നെ പൊറുക്കാൻ പറ്റാത്ത ഒന്നാണ് ” കാപ്പെല്ലോ പറഞ്ഞു.