FIFA World Cup 2026: ഇന്ത്യയിലെ ഒഫീഷ്യൽ ബ്രോഡ്കാസ്റ്റിംഗ് പാർട്ണറെ ഉടൻ പ്രഖ്യാപിക്കും; ആരാധകർക്ക് ആശ്വാസം!
ഇന്ത്യയിലെ ഫുട്ബോൾ ആരാധകർ ഏറെ ആകാംഷയോടെയും ആശങ്കയോടെയും കാത്തിരുന്ന ഒരു വലിയ വാർത്ത ഒടുവിൽ പുറത്തുവന്നിരിക്കുകയാണ്. വരാനിരിക്കുന്ന 2026 ഫിഫ ലോകകപ്പിന്റെ (FIFA World Cup 2026) ഇന്ത്യയിലെ ഔദ്യോഗിക ബ്രോഡ്കാസ്റ്റിംഗ് പങ്കാളിയെ അടുത്ത ആഴ്ച പ്രഖ്യാപിക്കുമെന്ന് ഓൾ ഇന്ത്യ ഫുട്ബോൾ ഫെഡറേഷൻ (AIFF) മുൻ ജനറൽ സെക്രട്ടറി ഷാജി പ്രഭാകരൻ അറിയിച്ചു.
കഴിഞ്ഞ കുറച്ചു മാസങ്ങളായി ഇന്ത്യയിൽ ലോകകപ്പ് മത്സരങ്ങൾ തത്സമയം കാണാൻ സാധിക്കുമോ എന്ന കാര്യത്തിൽ വലിയ അനിശ്ചിതത്വം നിലനിന്നിരുന്നു. ഇന്ത്യയിലെ മാധ്യമ അവകാശങ്ങളുമായി ബന്ധപ്പെട്ട ചർച്ചകൾ പ്രതിസന്ധിയിലായെന്നും, മത്സരങ്ങൾ സംപ്രേഷണം ചെയ്യാൻ കമ്പനികൾ മുന്നോട്ടുവരുന്നില്ലെന്നുമുള്ള വാർത്തകൾ ആരാധകരെ നിരാശരാക്കിയിരുന്നു. എന്നാൽ നിലവിൽ എല്ലാ ചർച്ചകളും വിജയകരമായി പൂർത്തിയായതായും ഔദ്യോഗിക പ്രഖ്യാപനം ഉടൻ ഉണ്ടാകുമെന്നുമാണ് പുതിയ റിപ്പോർട്ടുകൾ വ്യക്തമാക്കുന്നത്.
ചർച്ചകൾ പൂർത്തിയായതോടെ, ലോകകപ്പ് മത്സരങ്ങൾ ഇന്ത്യയിൽ പൂർണ്ണമായും തടസ്സമില്ലാതെ ലഭ്യമാകുമെന്ന് ഷാജി പ്രഭാകരൻ തന്റെ സോഷ്യൽ മീഡിയ പോസ്റ്റിലൂടെ ഉറപ്പുനൽകി.
ചരിത്രത്തിലെ ഏറ്റവും വലിയ ഫിഫ ലോകകപ്പിനായി കാത്തിരിക്കുന്ന ഇന്ത്യൻ ഫുട്ബോൾ പ്രേമികൾക്ക് വലിയ ആശ്വാസം നൽകുന്ന വാർത്തയാണിത്. ജൂൺ 11 മുതൽ ആരംഭിക്കുന്ന ലോകകപ്പ് മത്സരങ്ങൾ ഇനി ഏത് ചാനലിലൂടെയോ ഒടിടി (OTT) പ്ലാറ്റ്ഫോമിലൂടെയോ ആണ് ഇന്ത്യയിൽ തത്സമയം കാണാൻ സാധിക്കുക എന്നറിയാനുള്ള കാത്തിരിപ്പിലാണ് ആരാധകർ.
