CR7 ഒരു ഫുട്ബോൾ പ്രതിഭാസം’: പ്രശംസയായി റിവാൾഡോയുടെ വാക്കുകൾ

    പ്രായം വെറുമൊരു സംഖ്യ മാത്രമാണെന്ന് വീണ്ടും തെളിയിച്ച് ക്രിസ്റ്റ്യാനോ റൊണാൾഡോ കളം നിറഞ്ഞാടിയപ്പോൾ, ലോകകപ്പ് ഗ്രൂപ്പ് ഘട്ട മത്സരത്തിൽ ഉസ്ബെക്കിസ്ഥാനെതിരെ പോർച്ചുഗലിന് 5-0ന്റെ വമ്പൻ വിജയം. ക്രിസ്റ്റ്യാനോയുടെ ഈ അസാധാരണ പ്രകടനത്തെയും കരിയറിനെയും വാനോളം പുകഴ്ത്തിക്കൊണ്ട് ബ്രസീലിയൻ ഇതിഹാസം റിവാൾഡോ ഇൻസ്റ്റാഗ്രാമിൽ പങ്കുവെച്ച വാക്കുകൾ ഇപ്പോൾ സോഷ്യൽ മീഡിയയിൽ തരംഗമാണ്. ആദ്യ മത്സരത്തിൽ കോംഗോയ്‌ക്കെതിരെ ഗോൾ നേടാനാകാതിരുന്നതിന്റെ എല്ലാ നിരാശയും തീർക്കുന്ന പ്രകടനമാണ് ഉസ്ബെക്കിസ്ഥാനെതിരെ പോർച്ചുഗൽ പുറത്തെടുത്തത്.മത്സരത്തിന്റെ ആറാം മിനിറ്റിൽ തന്നെ ക്രിസ്റ്റ്യാനോ റൊണാൾഡോയിലൂടെ പോർച്ചുഗൽ ആദ്യ ഗോൾ നേടി ലീഡ് എടുത്തു.17-ാം മിനിറ്റിൽ ലഭിച്ച അവസരം കൃത്യമായി വിനിയോഗിച്ച് നുനോ മെൻഡിസ് പോർച്ചുഗലിന്റെ ലീഡ് രണ്ടാക്കി ഉയർത്തി.39-ാം മിനിറ്റിൽ റൊണാൾഡോ തന്റെ വ്യക്തിഗത രണ്ടാമത്തെ ഗോളും ടീമിന്റെ മൂന്നാമത്തെ ഗോളും വലയിലാക്കി ടീമിന്റെ വിജയം ആദ്യ പകുതിയിൽ തന്നെ ഉറപ്പിച്ചു.60-ാം മിനിറ്റിൽ ഉസ്ബെക്കിസ്ഥാൻ താരം അബ്ദു വോഹിദ് നെമാറ്റോവിന്റെ ഓൺ ഗോളും, 87-ാം മിനിറ്റിൽ റാഫേൽ ലിയാവോയുടെ മികച്ചൊരു ഫിനിഷിംഗും കൂടിയായപ്പോൾ പോർച്ചുഗലിന്റെ ഗോൾപട്ടിക 5-0 ആയി പൂർത്തിയായി.

    ബ്രസീലിന്റെ മുൻ ലോകകപ്പ് താരം റിവാൾഡോ ഇൻസ്റ്റാഗ്രാമിൽ കുറിച്ച വാക്കുകൾ ഇങ്ങനെയായിരുന്നു:
“ഈ ഫുട്ബോൾ പ്രതിഭാസത്തെ അഭിനന്ദിക്കേണ്ട ദിവസമാണിന്ന്. ആദ്യ മത്സരത്തിൽ ഗോൾ നേടാനായില്ലെങ്കിലും, ചരിത്രത്തിലെ ഏറ്റവും മികച്ച അത്ലറ്റുകളിൽ ഒരാളായി അദ്ദേഹത്തെ മാറ്റിയ ഘടകങ്ങൾ എന്തൊക്കെയാണെന്ന് അദ്ദേഹം പൂർണ്ണമായി കാണിച്ചുതന്നു: കഠിനാധ്വാനം, അർപ്പണബോധം, മത്സരബുദ്ധി, ഒടുങ്ങാത്ത വിജയദാഹം. അദ്ദേഹം മൈതാനത്ത് ഓടി നടന്നു, ഓരോ പന്തിനായും പോരാടി, ടീമിനെ സഹായിച്ചു, ഒരിക്കലും പ്രതീക്ഷ കൈവിട്ടില്ല.
ഇന്ന്, വീണ്ടും അദ്ദേഹം  മൈതാനത്ത് മറുപടി നൽകിയിരിക്കുന്നു. പോർച്ചുഗലിന്റെ വൻ വിജയത്തിൽ അദ്ദേഹം രണ്ട് ഗോളുകൾ നേടി. അച്ചടക്കവും പ്രൊഫഷണലിസവും അസാധാരണമായ മാനസികാവസ്ഥയുമുണ്ടെങ്കിൽ പ്രായം വെറുമൊരു സംഖ്യ മാത്രമാണെന്ന് അദ്ദേഹം വീണ്ടും തെളിയിച്ചു. കരിയറുടനീളം അദ്ദേഹം വെട്ടിത്തെളിച്ച പാത എല്ലാ തലമുറയിലെയും അത്ലറ്റുകൾക്ക് ഒരു പ്രചോദനമാണ്. അദ്ദേഹത്തിന്റെ പ്രതിഭ വലുതാണ്, എന്നാൽ അതിനേക്കാൾ ശ്രദ്ധേയമായത് സ്വയം നവീകരിക്കാനും അതിരുകൾ ഭേദിക്കാനും ഉയർന്ന തലത്തിൽ വർഷങ്ങളോളം മത്സരിക്കാനുമുള്ള അദ്ദേഹത്തിന്റെ കഴിവാണ്.”