മെസ്സി Vs ഹാലണ്ട്,ബാലൺഡി’ഓറിൽ തിയറി ഹെൻറി ആർക്കൊപ്പം?

കഴിഞ്ഞ സീസണിലെ ഏറ്റവും മികച്ച താരത്തിന് സമ്മാനിക്കുന്ന ബാലൺഡി’ഓർ പുരസ്കാരം ആര് സ്വന്തമാക്കും എന്നറിയാൻ ഇനി അധികകാലം കാത്തിരിക്കേണ്ടതില്ല. വരുന്ന തിങ്കളാഴ്ചയാണ് ഫ്രാൻസ് ഫുട്ബോൾ മാഗസിൻ ബാലൺഡി’ഓർ പുരസ്കാര ജേതാവിനെ പ്രഖ്യാപിക്കുക.സൂപ്പർ താരം ലയണൽ മെസ്സിക്ക് തന്നെയാണ് ഏറ്റവും കൂടുതൽ സാധ്യതകൾ കൽപ്പിക്കപ്പെടുന്നത്. എന്നാൽ സിറ്റി സൂപ്പർതാരമായ ഏർലിംഗ് ഹാലന്റ് മെസ്സിക്ക് കടുത്ത വെല്ലുവിളികൾ ഉയർത്തുന്നുമുണ്ട്.

രണ്ട് താരങ്ങളും കഴിഞ്ഞ സീസണിൽ ഏറെ മികച്ച പ്രകടനം നടത്തിയവരാണ്.അതുകൊണ്ടുതന്നെ ഫുട്ബോൾ ലോകത്ത് വ്യത്യസ്ത അഭിപ്രായങ്ങൾ ഉയരുന്നുണ്ട്. എന്നാൽ ഫ്രഞ്ച് ഇതിഹാസമായ തിയറി ഹെൻറി ലയണൽ മെസ്സിക്കൊപ്പമാണ് നിലകൊള്ളുന്നത്. ഖത്തർ വേൾഡ് കപ്പ് കിരീടം തന്നെയാണ് അദ്ദേഹം ഇതിനുള്ള കാരണമായി കൊണ്ട് ചൂണ്ടിക്കാണിക്കുന്നത്.ഹെൻറിയുടെ വാക്കുകൾ ഇങ്ങനെയാണ്.

” ഒരുപാട് ആളുകൾ ഈ വിഷയത്തിൽ ഡിബേറ്റുകൾ നടത്തുന്നുണ്ട്. പക്ഷേ എന്നെ സംബന്ധിച്ചിടത്തോളം ഇവിടെ വേൾഡ് കപ്പിന് തന്നെയാണ് മുൻഗണന. ലയണൽ മെസ്സി തന്നെയാണ് ബാലൺഡി’ഓർ അർഹിക്കുന്നത്.മാഞ്ചസ്റ്റർ സിറ്റി താരങ്ങൾക്ക് പലരും സാധ്യതകൾ കൽപ്പിക്കുന്നുണ്ട് എന്നുള്ളത് അറിയാം. എന്നാൽ എന്നെ സംബന്ധിച്ചിടത്തോളം ലയണൽ മെസ്സിക്ക് മാത്രമാണ് അതിന് അർഹത ” ഇതാണ് തിയറി ഹെൻറി പറഞ്ഞിട്ടുള്ളത്.

കഴിഞ്ഞ സീസണിൽ 52 ഗോളുകൾ നേടിയ ഹാലണ്ട് മാഞ്ചസ്റ്റർ സിറ്റിക്കൊപ്പം 3 കിരീടങ്ങൾ നേടുകയും ചെയ്തിട്ടുണ്ട്. അതേസമയം ലയണൽ മെസ്സിയുടെ നേതൃത്വത്തിലാണ് അർജന്റീന വേൾഡ് കപ്പ് കിരീടം നേടിയത്.വേൾഡ് കപ്പിലെ ഏറ്റവും മികച്ച താരത്തിനുള്ള ഗോൾഡൻ ബോൾ മെസ്സി തന്നെയായിരുന്നു സ്വന്തമാക്കിയിരുന്നത്.