മെസ്സിയോ ലെവയോ അല്ല,ബാലൺ ഡി’ഓർ നേടാൻ താൻ ഇഷ്ടപ്പെടുന്ന താരത്തെ വെളിപ്പെടുത്തി ജോർഗീഞ്ഞോ!

ഈ മാസം 29-ആം തിയ്യതിയാണ് ഫുട്ബോൾ ലോകത്തെ ഏറ്റവും മികച്ച താരത്തിന് സമ്മാനിക്കുന്ന ബാലൺ ഡി’ഓർ പുരസ്‌കാരജേതാവിനെ അറിയാൻ കഴിയുക. ഇതിന് മുന്നേയുള്ള 30 അംഗ ലിസ്റ്റൊക്കെ ഫ്രാൻസ് ഫുട്ബോൾ പുറത്ത് വിട്ടിരുന്നു. അതിൽ ഇടം നേടാൻ ചെൽസി സൂപ്പർ താരം ജോർഗീഞ്ഞോക്ക്‌ സാധിച്ചിരുന്നു. ചാമ്പ്യൻസ് ലീഗും യൂറോ കപ്പുമൊക്കെ നേടിയ ജോർഗീഞ്ഞോക്ക്‌ ബാലൺ ഡി’ഓർ നൽകണമെന്ന അഭിപ്രായക്കാരും ഫുട്ബോൾ ലോകത്തുണ്ട്. ഏതായാലും ജോർഗീഞ്ഞോയുടെ അഭിപ്രായത്തിൽ ബാലൺ ഡി’ഓർ നൽകേണ്ടത് മെസ്സിക്കോ ലെവന്റോസ്ക്കിക്കോ അല്ല, മറിച്ച് മാഞ്ചസ്റ്റർ സിറ്റിയുടെ സൂപ്പർ താരമായ കെവിൻ ഡി ബ്രൂയിനക്കാണ്. തന്റെ വോട്ട് ഡിബ്രൂയിനക്കായിരിക്കുമെന്നാണ് ജോർഗീഞ്ഞോ അറിയിച്ചത്. താരം ഇഎസ്പിഎൻ ബ്രസീലിനോടുള്ള അഭിമുഖത്തിൽ പറഞ്ഞത് ഇങ്ങനെയാണ്.

” ഞാൻ എന്റെ വോട്ട് കെവിൻ ഡി ബ്രൂയിനക്കായിരിക്കും നൽകുക.എന്തെന്നാൽ അദ്ദേഹം എല്ലാ ചെയ്യുന്ന ഒരു വ്യക്തിയാണ്. കഴിഞ്ഞ കുറച്ചു വർഷങ്ങളായി മനോഹരമായ ഫുട്ബോൾ കളിച്ചു കൊണ്ടിരിക്കുന്ന താരമാണ് അദ്ദേഹം.ഫുട്ബോളിനെ ഇഷ്ടപ്പെടുന്നവർ അദ്ദേഹത്തെ കാണുന്നത് ഇഷ്ടപ്പെടുന്നു. എന്തെന്നാൽ അദ്ദേഹം ഫുട്ബോളിനെ മനസ്സിലാക്കുന്ന രീതി അപാരമാണ്.എപ്പോഴും വലിയ ബുദ്ധിവൈഭവമുള്ള താരമാണ് ഡി ബ്രൂയിന ” ജോർഗീഞ്ഞോ പറഞ്ഞു.