മെസ്സിയെയും ക്രിസ്റ്റ്യാനോയെയും താരതമ്യം ചെയ്ത് ലെവന്റോസ്ക്കി!

ഫുട്ബോൾ ലോകത്ത് പകരം വെക്കാനില്ലാത്ത രണ്ട് ഇതിഹാസതാരങ്ങളാണ് ലയണൽ മെസ്സിയും ക്രിസ്റ്റ്യാനോ റൊണാൾഡോയും. പത്ത് പതിനഞ്ച് വർഷക്കാലത്തോളമായി ഇരുവരും ഒരുമിച്ച് ഫുട്ബോൾ ലോകം ഭരിക്കുകയാണ്. എന്നാൽ കഴിഞ്ഞ രണ്ട് സീസണുകളിൽ റോബർട്ട്‌ ലെവന്റോസ്ക്കി സമാനമായ പ്രകടനം കാഴ്ച്ചവെച്ച് ഏറെ പ്രശംസകൾ നേടിയിരുന്നു.

ഏതായാലും ക്രിസ്റ്റ്യാനോ റൊണാൾഡോയുടെയും ലയണൽ മെസ്സിയുടെയും സവിശേഷതകളെ കുറിച്ച് റോബർട്ട്‌ ലെവന്റോസ്ക്കി തന്റെ അഭിപ്രായങ്ങൾ രേഖപ്പെടുത്തിയിട്ടുണ്ട്. അതായത് ക്രിസ്റ്റ്യാനോ റൊണാൾഡോ തന്റെ ഹാർഡ് വർക്കിലൂടെ വിജയിച്ച താരമാണെന്നും എന്നാൽ മെസ്സിയെ സംബന്ധിച്ചിടത്തോളം അദ്ദേഹത്തിന് എല്ലാം എളുപ്പമാണ് എന്നുമാണ് ലെവന്റോസ്ക്കി അറിയിച്ചിട്ടുള്ളത്. മെസ്സി വളരെയധികം പ്രതിഭാധനനാണ് എന്നാണ് അദ്ദേഹം പറഞ്ഞു വെക്കുന്നത്.കഴിഞ്ഞ ദിവസം സ്പോർട്ട് ബിൽഡിനോട് സംസാരിക്കുകയായിരുന്നു അദ്ദേഹം. ലെവന്റോസ്ക്കിയുടെ വാക്കുകൾ ഗോൾ റിപ്പോർട്ട്‌ ചെയ്യുന്നത് ഇങ്ങനെയാണ്.

” ഞാൻ ക്രിസ്റ്റ്യാനോ റൊണാൾഡോയുടെ ഹാർഡ് വർക്കിനെ ഞാൻ ബഹുമാനിക്കുന്നു. അദ്ദേഹത്തിന്റെ ഹാർഡ് വർക്കാണ് ഈ വിജയത്തിന് കാരണമെന്ന് ഞാൻ കരുതുന്നു. മെസ്സിയുടെ കാര്യത്തിലേക്ക് വന്നാൽ അദ്ദേഹത്തിന് എല്ലാം എളുപ്പമാണ് ” ഇതാണ് ഇരുവരെയും കുറിച്ച് ലെവന്റോസ്ക്കി പറഞ്ഞത്.

ഇത്തവണത്തെ ബാലൺ ഡി’ഓറിന് വേണ്ടിയും മെസ്സിക്കും ലെവന്റോസ്ക്കിക്കും ഇടയിൽ കടുത്ത പോരാട്ടം നടന്നിരുന്നു. ഒടുവിൽ ലെവന്റോസ്ക്കിയെ പിന്തള്ളിക്കൊണ്ട് ലയണൽ മെസ്സി തന്നെ ബാലൺ ഡി’ഓറിൽ മുത്തമിടുകയായിരുന്നു.അതേസമയം ക്രിസ്റ്റ്യാനോ റൊണാൾഡോക്ക് ആറാം സ്ഥാനത്താണ് ഫിനിഷ് ചെയ്യാൻ സാധിച്ചത്.