ക്രിസ്റ്റ്യാനോയുടെ വീട്ടിൽ മോഷണം, കൊണ്ടുപോയത് യുവന്റസിന്റെ ജേഴ്സി !

സൂപ്പർ താരം ക്രിസ്റ്റ്യാനോ റൊണാൾഡോയുടെ വീട്ടിൽ മോഷണം. താരത്തിന്റെ പോർച്ചുഗല്ലിലെ മെദീരയിലുള്ള ഏഴ് നില വീട്ടിലാണ് മോഷണം നടന്നത്. ചില അറ്റകുറ്റ പണികൾക്ക്‌ വേണ്ടി വീടിന്റെ ഗാരേജ് തുറന്ന് കിടക്കുകയായിരുന്നു. ഈ ഭാഗത്തിലൂടെയാണ് മോഷ്ടാവ് അകത്തേക്ക് പ്രവേശിച്ചത് എന്നാണ് അനുമാനിക്കപ്പെടുന്നത്. ബുധനാഴ്ച്ച രാവിലെ സെക്യൂരിറ്റി അലാറം അടിക്കുന്നത് താരത്തിന്റെ ബന്ധു കേൾക്കുകയും തുടർന്ന് പോലീസിനെ അറിയിക്കുകയുമായിരുന്നു. സൈൻ ചെയ്യപ്പെട്ട ഒരു യുവന്റസിന്റെ ജേഴ്‌സിയും 180 പൗണ്ട് വില വരുന്ന ചില വസ്തുക്കളുമാണ് മോഷണം പോയിരിക്കുന്നത്. ഏഴ് നിലയുള്ള വീടിന്റെ അടിഭാഗത്താണ് മോഷണം നടന്നിരിക്കുന്നത്. പോർച്ചുഗീസ് മാധ്യമങ്ങൾ തന്നെയാണ് ഇക്കാര്യം റിപ്പോർട്ട്‌ ചെയ്തിരിക്കുന്നത്. റൊണാൾഡോയാവട്ടെ നിലവിൽ പോർച്ചുഗീസ് ടീമിനൊപ്പമാണ്.

എന്നാൽ സിസിടിവി ക്യാമറകൾ വഴി മോഷ്ടാവ് ആരെന്ന് പോലീസ് തിരിച്ചറിഞ്ഞിട്ടുണ്ട്.ഒന്ന് രണ്ട് പേർക്ക് പരിചയമുള്ള ആള് തന്നെയാണ് മോഷ്ടാവ്. എന്നാൽ ഇതുവരെ അറസ്റ്റുകൾ ഒന്നും തന്നെ രേഖപ്പെടുത്തിയിട്ടില്ല. മോഷണം നടക്കുന്ന സമയത്ത് റൊണാൾഡോയുടെ അമ്മയും സഹോദരനും വീട്ടിൽ ഉണ്ടായിരുന്നോ എന്ന് വ്യക്തമല്ല. അതേസമയം താരത്തിന്റെ കാമുകിയായ ജോർജിനോ റോഡ്രിഗസ് നിലവിൽ പാരീസിലെ ഫാഷൻ ഷോയിലാണ്. ലോക്ക്ഡൌൺ സമയത്ത് റൊണാൾഡോ താമസിച്ചിരുന്ന വീടായിരുന്നു ഇത്. 2015-ലായിരുന്നു റൊണാൾഡോ ഈ സ്വപ്നഭവനം സ്വന്തമാക്കിയിരുന്നത്.