ക്രിസ്റ്റ്യാനോക്ക് പോലും എത്തിപ്പിടിക്കാനാവാത്ത തലത്തിലാണ് മെസ്സിയെന്ന് ബെക്കാം

ക്രിസ്റ്റ്യാനോ റൊണാൾഡോക്ക് പോലും എത്തിപ്പിടിക്കാനാവാത്തത്ര ഉയരത്തിലാണ് മെസ്സിയെന്ന താരമെന്ന് മുൻ ഇംഗ്ലണ്ട് സൂപ്പർ താരം ഡേവിഡ് ബെക്കാം. കഴിഞ്ഞ ദിവസം ടെലാമിന് നൽകിയ അഭിമുഖത്തിലാണ് അദ്ദേഹം മെസ്സിയെ കുറിച്ച് സംസാരിക്കാൻ സമയം കണ്ടെത്തിയത്. മെസ്സി എന്ന താരം മറ്റൊരു തലത്തിലാണെന്നും ക്രിസ്റ്റ്യാനോ അതിന് താഴെ മാത്രമേ വരികയൊള്ളൂ എന്നുമായിരുന്നു അദ്ദേഹത്തിന്റെ പ്രസ്താവന. മെസ്സിക്കെതിരെ കളിച്ച അനുഭവവും അദ്ദേഹം അഭിമുഖത്തിൽ പങ്കുവെച്ചു.

” അദ്ദേഹത്തിന്റെ പ്രതിഭയുടെ തലത്തിൽ അദ്ദേഹം ഒറ്റക്കാണ്. അദ്ദേഹത്തെ പോലെയാവുക എന്നുള്ളത് മറ്റുള്ള താരങ്ങൾക്ക് സാധിക്കുന്ന ഒന്നല്ല. ക്രിസ്റ്റ്യാനോക്ക് പോലും അദ്ദേഹത്തിന്റെ തലത്തിൽ എത്തിപ്പെടാൻ സാധിക്കുന്നില്ല. അദ്ദേഹത്തിന്റെ പ്രായത്തിൽ ഞാനും മത്സരങ്ങളെ ആസ്വദിച്ചിരുന്നു. ഒരിക്കലും തോൽക്കാൻ ഇഷ്ടപ്പെട്ടിരുന്നില്ല. ക്യാമ്പ്നൗവിലെ മത്സരം ഞാൻ ഇപ്പോഴും ഓർക്കുന്നുണ്ട്. അന്ന് മെസ്സി ഇറങ്ങിയതിന് ശേഷമാണ് ബാഴ്സ സമനില നേടിയത്. പക്ഷെ രണ്ട് മത്സരങ്ങളിലും യുണൈറ്റഡ് മികച്ച പ്രകടനം തന്നെയാണ് കാഴ്ച്ചവെച്ചത്. അന്ന് ബാഴ്സലോണക്കെതിരെ തോൽക്കാൻ ഞങ്ങൾ തയ്യാറായിരുന്നില്ല ” ബെക്കാം പറഞ്ഞു