അർജന്റീനയുമായി മുട്ടാൻ താൻ പൂർണ്ണ സജ്ജനെന്ന് പോർച്ചുഗൽ സൂപ്പർ താരം !

     ലോകമെമ്പാടുമുള്ള കോടിക്കണക്കിന് ഫുട്ബോൾ പ്രേമികൾ നെഞ്ചിലേറ്റുന്ന സ്വപ്നമാണ് ലോകകപ്പിന്റെ ഫൈനൽ പോരാട്ടത്തിൽ ക്രിസ്റ്റ്യാനോ റൊണാൾഡോയുടെ പോർച്ചുഗലും ലയണൽ മെസ്സിയുടെ അർജന്റീനയും നേർക്കുനേർ വരിക എന്നത്. 2026 ഫിഫ വേൾഡ് കപ്പിന്റെ ആവേശം കൊടുമുടിയിലെത്തി നിൽക്കെ, ആരാധകരുടെ ഈ സ്വപ്ന ഫൈനലിനെക്കുറിച്ച് മനസ്സ് തുറന്നിരിക്കുകയാണ് പോർച്ചുഗലിന്റെ മിഡ്ഫീൽഡ് മാന്ത്രികൻ വിറ്റിൻഹ.
ഒരു അഭിമുഖത്തിനിടയിൽ ഉയർന്നുവന്ന ചോദ്യത്തിനാണ് പി.എസ്.ജി (PSG) താരമായ വിറ്റിൻഹ തന്റെ ആഗ്രഹം വ്യക്തമാക്കിയത്. “അർജന്റീനയും പോർച്ചുഗലും തമ്മിലുള്ള ഒരു ഫൈനൽ കാണാൻ ആഗ്രഹിക്കുന്നുണ്ടോ?” എന്ന ചോദ്യത്തിന്, “തീർച്ചയായും” എന്നായിരുന്നു താരത്തിന്റെ മറുപടി.
“എതിരാളികൾ ആരായാലും ശരി, ഈ ലോകകപ്പിന്റെ ഫൈനലിൽ കളിക്കാൻ ഞാൻ വളരെയധികം ആഗ്രഹിക്കുന്നുണ്ട്. ഇനി അത് പോർച്ചുഗലും അർജന്റീനയും തമ്മിലാണെങ്കിൽ, എനിക്ക് അതിൽ പൂർണ്ണ സന്തോഷമേയുള്ളൂ.” – വിറ്റിൻഹ വ്യക്തമാക്കി.

   ക്രിസ്റ്റ്യാനോ റൊണാൾഡോ നയിക്കുന്ന പോർച്ചുഗൽ ടീം ഇത്തവണ മികച്ച ഫോമിലാണ്. വിറ്റിൻഹ, ബ്രൂണോ ഫെർണാണ്ടസ്, ബെർണാർഡോ സിൽവ തുടങ്ങിയ ലോകോത്തര താരങ്ങളടങ്ങിയ പോർച്ചുഗീസ് പട ഏത് വമ്പന്മാരെയും വീഴ്ത്താൻ കെൽപ്പുള്ളവരാണ്. തങ്ങളുടെ കരിയറിലെ ആദ്യ ലോകകപ്പ് കിരീടം ലക്ഷ്യമിട്ടാണ് അവർ അമേരിക്കയിലും മെക്സിക്കോയിലുമായി പന്തുരുട്ടുന്നത്.
നിലവിലെ ചാമ്പ്യന്മാരായ അർജന്റീനയെ ഫൈനലിൽ നേരിടേണ്ടി വന്നാൽ പോലും തങ്ങൾ ഭയപ്പെടില്ലെന്നും, കിരീടത്തിൽ കുറഞ്ഞതൊന്നും പോർച്ചുഗൽ ലക്ഷ്യം വെക്കുന്നില്ലെന്നുമാണ് വിറ്റിൻഹയുടെ വാക്കുകൾ സൂചിപ്പിക്കുന്നത്. ഒരുപക്ഷേ ഫുട്ബോൾ ചരിത്രം കണ്ടതിൽ വച്ച് ഏറ്റവും വലിയ ഫൈനൽ പോരാട്ടത്തിനാണോ 2026 സാക്ഷ്യം വഹിക്കാൻ പോകുന്നത് എന്ന് കാത്തിരുന്ന് തന്നെ കാണാം.