റാമോസ് പിഎസ്ജിയിലേക്കെത്തിയാൽ താനും എംബാപ്പെയും കരാർ പുതുക്കുമെന്ന് നെയ്മർ പറഞ്ഞു? വെളിപ്പെടുത്തിയത് സ്പാനിഷ് ജേണലിസ്റ്റ് !

റയൽ മാഡ്രിഡ്‌ നായകൻ സെർജിയോ റാമോസിന്റെ കരാർ ഈ സീസണോട് കൂടി അവസാനിക്കാനിരിക്കുകയാണ്. താരത്തിന്റെ കരാർ ഇതുവരെ പുതുക്കുകയോ അതുമായി ബന്ധപ്പെട്ട ചർച്ചകൾ നടത്തുകയോ ചെയ്തിട്ടില്ല. അത്കൊണ്ട് തന്നെ റാമോസ് റയൽ മാഡ്രിഡ്‌ വിടുമെന്ന അഭ്യൂഹങ്ങൾ ശക്തമാണ്. റാമോസിനെ ക്ലബ്ബിലെത്തിക്കാൻ മുൻപന്തിയിലുള്ളത് ഫ്രഞ്ച് വമ്പൻമാരായ പിഎസ്ജിയാണ് എന്നുള്ളത് വിവിധ മാധ്യമങ്ങൾ റിപ്പോർട്ട്‌ ചെയ്തിരുന്നു. എന്നാൽ മറ്റൊരു വെളിപ്പെടുത്തലുമായി രംഗത്ത് വന്നിരിക്കുകയാണ് സ്പാനിഷ് ജേണലിസ്റ്റ് ആയ ആൽഫ്രഡോ ഡ്യൂറോ.കഴിഞ്ഞ ദിവസം എൽ ചിരിങ്കിറ്റൊ ടിവിക്ക് നൽകിയ അഭിമുഖത്തിലാണ് അദ്ദേഹം വെളിപ്പെടുത്തിയത്. നെയ്മർ റാമോസുമായി ഫോണിൽ ബന്ധപ്പെട്ടുവെന്നും റാമോസ് പിഎസ്ജിയിലേക്ക് വരികയാണെങ്കിൽ താനും എംബാപ്പെയും പിഎസ്ജിയിൽ കരാർ പുതുക്കുമെന്ന് നെയ്മർ റാമോസിന് വാഗ്ദാനം ചെയ്തിട്ടുണ്ട് എന്നുമായിരുന്നു ഇദ്ദേഹത്തിന്റെ വെളിപ്പെടുത്തൽ. എന്നാൽ ഇതിന് യാതൊരു വിശ്വസനീയമായ സ്ഥിരീകരണങ്ങളുമില്ല.ഈ സ്പാനിഷ് ജേണലിസ്റ്റ് മാത്രമാണ് ഇക്കാര്യം അറിയിച്ചിട്ടുള്ളത്.

” സെർജിയോ റാമോസ്, നീ പിഎസ്ജിയിലേക്ക് വരികയാണെങ്കിൽ അടുത്ത ദിവസം തന്നെ ഞാൻ കരാർ പുതുക്കാനുള്ള നടപടികൾ തുടങ്ങും. അതിന് ശേഷം കിലിയൻ എംബാപ്പെയും കരാർ പുതുക്കും. നീ പിഎസ്ജിയിലേക്ക് വരികയാണെങ്കിൽ ചുരുങ്ങിയത് രണ്ട് യൂറോപ്യൻ കപ്പെങ്കിലും നമുക്ക് നേടാം ” ഇതാണ് നെയ്മർ പറഞ്ഞതായി ഈ സ്പാനിഷ് ജേണലിസ്റ്റ് അവകാശപ്പെടുന്നത്. സ്പാനിഷ് മാധ്യമമായി സ്പോർട്ട് ഉൾപ്പടെ ഇക്കാര്യം റിപ്പോർട്ട്‌ ചെയ്തിട്ടുണ്ടെങ്കിലും ഇതിലെ സത്യാവസ്ഥ എത്രത്തോളമാണ് എന്നറിയില്ല. ഏതായാലും പിഎസ്ജിക്ക്‌ റാമോസിനെ സ്വന്തമാക്കാൻ താല്പര്യമുണ്ട് എന്നുള്ളത് ഫ്രഞ്ച് മാധ്യമങ്ങൾ തന്നെ റിപ്പോർട്ട്‌ ചെയ്തിരുന്നു. റാമോസ് കരാർ പുതുക്കാൻ വൈകുന്നത് റയൽ ആരാധകർക്കിടയിൽ ആശങ്കക്ക്‌ വഴിവെക്കുന്നുണ്ട്.