മൂന്ന് ലീഗുകളിൽ സെഞ്ച്വറി! വീണ്ടും ചരിത്രം കുറിച്ച് ക്രിസ്റ്റ്യാനോ റൊണാൾഡോ

        ഫുട്ബോൾ ലോകത്ത് റെക്കോർഡുകൾ റൊണാൾഡോയെ തേടി വരികയല്ല, മറിച്ച് റൊണാൾഡോ റെക്കോർഡുകൾക്ക് പിന്നാലെ കുതിക്കുകയാണെന്ന് അദ്ദേഹം വീണ്ടും തെളിയിച്ചിരിക്കുന്നു. 41-ാം വയസ്സിലും തന്റെ ഗോൾ വേട്ട തുടരുന്ന CR7, സൗദി പ്രോ ലീഗിൽ (Roshn Saudi League) അൽ-നസർ ജേഴ്സിയിൽ തന്റെ 100-ാം ഗോൾ പൂർത്തിയാക്കിയിരിക്കുകയാണ്. ഇതോടെ പ്രീമിയർ ലീഗ്, ലാ ലിഗ, സൗദി പ്രോ ലീഗ് എന്നിങ്ങനെ മൂന്ന് വ്യത്യസ്ത രാജ്യങ്ങളിലെ ടോപ്പ് ടയർ ലീഗുകളിൽ 100 ഗോളുകൾ നേടുന്ന ആദ്യ താരമായി റൊണാൾഡോ മാറി.



    
സൗദി ലീഗിലെ റൊണാൾഡോയുടെ ഈ 100 ഗോളുകൾ വെറുമൊരു സംഖ്യയല്ല, മറിച്ച് അദ്ദേഹത്തിന്റെ ക്ലിനിക്കൽ ഫിനിഷിംഗിന്റെ കൃത്യമായ അടയാളപ്പെടുത്തലാണ്.  Right Foot 70 ഗോളുകൾ,
Left Foot 18 ഗോളുകൾ,ഹെഡറുകൾ 11 ഗോളുകൾ,
മറ്റുള്ളവ (Back): 1 ഗോൾ എന്നിങ്ങനെയാണ് അദ്ദേഹത്തിൻ്റെ ഗോളുകളുടെ വേർത്തിരിവുകൾ.
വെറും 9,146 മിനിറ്റുകൾ കളിക്കളത്തിൽ ചിലവഴിച്ചാണ് അദ്ദേഹം ഈ നേട്ടം കൈവരിച്ചത്. അതായത് ഓരോ 90 മിനിറ്റിലും ശരാശരി 0.98 ഗോളുകൾ വീതം അദ്ദേഹം സ്കോർ ചെയ്തു.



    യൂറോപ്പിലെ വമ്പൻ ലീഗുകളിൽ ആധിപത്യം ഉറപ്പിച്ച ശേഷം ഏഷ്യൻ മണ്ണിലും തന്റെ സിംഹാസനം ഉറപ്പിക്കാൻ റൊണാൾഡോയ്ക്ക് സാധിച്ചു. സ്പാനിഷ് ലാലിഗ 311, ഇംഗ്ലീഷ് പ്രീമിയർ ലീഗ് 103, സൗദി പ്രോ ലീഗ് 100, എന്നിങ്ങനെയാണ് അദ്ദേഹത്തിൻ്റെ ലീഗ് ഗോളുകളുടെ കണക്ക്.
      


        പ്രായം വെറും നമ്പറാണെന്ന് ഓരോ മത്സരത്തിലും റൊണാൾഡോ തെളിയിക്കുന്നു. അൽ-ഷബാബിനെതിരായ മത്സരത്തിൽ മാനെയുടെ ക്രോസ്സ് ഒരു തകർപ്പൻ ഇടംകാലൻ ഷോട്ടിലൂടെ വലയിലാക്കിയാണ് അദ്ദേഹം തന്റെ 100-ാം ഗോൾ ആഘോഷിച്ചത്. ഈ സീസണിൽ മാത്രം 26 ഗോളുകൾ നേടിയ താരം തന്റെ ടീമിനെ കിരീടപ്പോരാട്ടത്തിൽ മുൻപന്തിയിൽ എത്തിക്കുന്നതിൽ നിർണ്ണായക പങ്കുവഹിക്കുന്നു.