ക്ലബുമായുള്ള കരാറവസാനിക്കുന്നു, ഫ്രീ ഏജന്റാവുന്ന സൂപ്പർ താരങ്ങൾ ഇവരൊക്കെ!

ഈ സമ്മർ ട്രാൻസ്ഫർ ജാലകത്തിൽ ഫ്രീ ഏജന്റുമാരായ ഒരുപിടി സൂപ്പർ താരങ്ങളെ നമുക്ക് കാണാൻ സാധിക്കും. പല താരങ്ങളുടെയും തങ്ങളുടെ ക്ലബുമായുള്ള കരാർ അവസാനിക്കാനിരിക്കുകയാണ്. ഫ്രീ ഏജന്റുമാരാവുന്ന ചില സൂപ്പർ താരങ്ങളെ ആരൊക്കെയാണെന്ന് നമുക്ക് നോക്കാം.

ഒന്നാമത്തെ താരം ലയണൽ മെസ്സിയാണ്. എഫ്സി ബാഴ്സലോണയുമായുള്ള മെസ്സിയുടെ കരാർ കഴിഞ്ഞ ദിവസം അവസാനിച്ചു. താരമിപ്പോൾ ഫ്രീ ഏജന്റാണ്. പക്ഷേ മെസ്സി ബാഴ്‌സയുമായി കരാർ പുതുക്കുമെന്ന് തന്നെയാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്.

മറ്റൊരു താരം റയൽ മാഡ്രിഡ്‌ നായകനായിരുന്ന സെർജിയോ റാമോസാണ്. താരം റയലിനോട് വിടപറഞ്ഞു. മറ്റുള്ള ക്ലബുകളുമായി റാമോസ് ചർച്ചകൾ നടത്തുന്നുണ്ട്. പിഎസ്ജിയാണ് ഇക്കാര്യത്തിൽ മുമ്പിലുള്ളത്.

അടുത്ത താരം ജിയാൻ ലൂയിജി ഡോണ്ണരുമയാണ്. എസി മിലാന്റെ ഇറ്റാലിയൻ ഗോൾകീപ്പറായ ഇദ്ദേഹം ഫ്രീ ഏജന്റാവാനിരിക്കുകയാണ്. താരമിപ്പോൾ പിഎസ്ജിയിൽ എത്തുന്നതിന്റെ തൊട്ടരികിലാണ്.

അടുത്ത താരം എസി മിലാന്റെ ഹകാൻ ചൽഹനോഗ്ലുവാണ്. താരമിപ്പോൾ ചിരവൈരികളായ ഇന്റർ മിലാനിലേക്ക് ചേക്കേറാനുള്ള ഒരുക്കത്തിലാണ്..

അടുത്ത താരം ബയേൺ ഡിഫൻഡർ ജെറോം ബോട്ടങ്ങാണ്. പത്ത് വർഷക്കാലം ബയേണിന് വേണ്ടി കളിച്ച താരം ക്ലബ്ബിനോട് വിടപറഞ്ഞിരുന്നു. താരം എങ്ങോട്ട് എന്നുള്ളത് വ്യക്തമല്ല.

മറ്റൊരു താരം ബ്രസീലിയൻ ഡിഫൻഡറായ ഡേവിഡ് ലൂയിസാണ്. ആഴ്സണൽ താരമായ അദ്ദേഹത്തിന്റെ കരാർ അവസാനിച്ചു കഴിഞ്ഞു..

മറ്റൊരു താരം അത്ലറ്റിക്കോ മാഡ്രിഡിന്റെ ഡിയഗോ കോസ്റ്റയാണ്. സ്പാനിഷ് താരമായ കോസ്റ്റ മറ്റൊരു ക്ലബ്ബിലേക്ക് ചേക്കേറാനുള്ള ഒരുക്കത്തിലാണ്. ഏതായാലും ഈ സൂപ്പർ താരങ്ങളെയെല്ലാം ട്രാൻസ്ഫർ ജാലകത്തിൽ ലഭ്യമാവുമെന്ന കാര്യത്തിൽ സംശയമില്ല.