അർജന്റീനയുടെ നെഞ്ചിടിപ്പ് വർധിപ്പിച്ച താരത്തെ നോട്ടമിട്ട് മാഞ്ചസ്റ്റർ യുണൈറ്റഡ്!

കഴിഞ്ഞ ഖത്തർ വേൾഡ് കപ്പ് ഫൈനലിൽ അർജന്റീനയും ഫ്രാൻസും തമ്മിലായിരുന്നു ഏറ്റുമുട്ടിയിരുന്നത്.പെനാൽറ്റി ഷൂട്ടൗട്ടിൽ ഫ്രാൻസിനെ പരാജയപ്പെടുത്തിക്കൊണ്ട് അർജന്റീന കിരീടം നേടുകയും ചെയ്തു. ഇരു ടീമുകളും മൂന്ന് ഗോളുകൾ നേടി നിൽക്കുന്ന ആ അവസാന നിമിഷത്തിൽ ഫ്രാൻസ് സൂപ്പർ താരമായ കോലോ മുവാനിക്ക് ഒരു സുവർണ്ണാവസരം ലഭിച്ചിരുന്നു. എന്നാൽ അദ്ദേഹത്തിന്റെ ഷോട്ട് അർജന്റീന ഗോൾ കീപ്പറായ എമി മാർട്ടിനസ് തടയുകയായിരുന്നു.

അർജന്റീന ആരാധകരുടെ നെഞ്ചിടിപ്പ് വർധിപ്പിച്ച ഒരു സന്ദർഭമായിരുന്നു അത്. ഏതായാലും ആ താരത്തെ സ്വന്തമാക്കാൻ ഇപ്പോൾ പ്രീമിയർ ലീഗ് വമ്പൻമാരായ മാഞ്ചസ്റ്റർ യുണൈറ്റഡിന് താല്പര്യമുണ്ട് എന്ന വാർത്തകളാണ് പുറത്തേക്ക് വന്നിട്ടുള്ളത്.മാഞ്ചസ്റ്റർ ഈവനിംഗ് ന്യൂസ് ആണ് ഇക്കാര്യം റിപ്പോർട്ട് ചെയ്തിട്ടുള്ളത്.

ക്രിസ്റ്റ്യാനോ റൊണാൾഡോ ക്ലബ്ബ് വിട്ടതിനാൽ ഒരു മികച്ച സ്ട്രൈക്കറെ ആ പൊസിഷനിലേക്ക് യുണൈറ്റഡിന് ആവശ്യമുണ്ട്.ഹാരി കെയ്നിനെയാണ് യുണൈറ്റഡ് ഏറ്റവും കൂടുതൽ ലക്ഷ്യം വെക്കുന്നതെങ്കിലും അദ്ദേഹത്തെ സ്വന്തമാക്കുക എന്നുള്ളത് സങ്കീർണമായ കാര്യമാണ്. അതുകൊണ്ടാണ് കോലോ മുവാനിയുടെ സാഹചര്യം ഇപ്പോൾ യുണൈറ്റഡ് നിരീക്ഷിച്ചു കൊണ്ടിരിക്കുന്നത്. 24 കാരനായ ഈ താരം ജർമ്മൻ ക്ലബ്ബായ ഫ്രാങ്ക്ഫർട്ടിന് വേണ്ടിയാണ് ഇപ്പോൾ കളിച്ചു കൊണ്ടിരിക്കുന്നത്.

ഈ സീസണിൽ എല്ലാ കോമ്പറ്റീഷനുകളിലുമായി 16 ഗോളുകളും 14 അസിസ്റ്റുകളും നേടിയിട്ടുള്ള താരമാണ് കോലോ മുവാനി. ട്രാൻസ്ഫർ മാർക്കറ്റിന്റെ കണക്കുകൾ പ്രകാരം 65 മില്യൺ യൂറോയാണ് താരത്തിന്റെ മൂല്യം. അതേസമയം ഫ്രഞ്ച് വമ്പൻമാരായ പിഎസ്ജിക്കും ഈ താരത്തെ സ്വന്തമാക്കാൻ താല്പര്യമുണ്ട്. കഴിഞ്ഞ ഖത്തർ വേൾഡ് കപ്പിൽ മൊറോക്കോക്കെതിരെയുള്ള സെമി ഫൈനൽ മത്സരത്തിൽ ഇദ്ദേഹം ഒരു ഗോൾ കണ്ടെത്തിയിരുന്നു.